Ерөнхийлөгч У.Хүрэлсүх Туркменистанд хийж буй төрийн айлчлалынхаа хүрээнд “Цаг үе, соёл иргэншлийн хэлхээ холбоо-Энх тайван, хөгжлийн үндэс суурь” олон улсын форумд хүндэт зочноор оролцжээ. Тэрээр нээлтийн үйл ажиллагаанд үг хэлсэн байна.

Уг арга хэмжээг Туркменистаны төр, Засгийн газраас тус улсын нэрт яруу найрагч, сэтгэгч Махтумгулы Фраги-гийн мэндэлсний 300 жилийн ойд зориулан зохион байгуулжээ.

Тус форумд Армени, Иран, Казахстан, Киргиз, Пакистан, Орос, Тажикистан, Узбекистаны төрийн тэргүүн нар, Азербайжан, Ирак, Турк улсаас өндөр түвшинд төлөөлөгчид оролцов.

Ерөнхийлөгч форумын хүрээнд зарим орны төрийн тэргүүнтэй уулзаж, хоёр талын харилцаа, хамтын ажиллагаа, бүс нутаг, олон улсын тавцан дахь хамтын ажиллагааны асуудлаар санал солилцов.

Нэрт яруу найрагч Махтумгулы Фраги-гийн уран бүтээлүүд нь Туркменийн ард түмний эв нэгдэл, найрамдлын үзэл санаан дээр суурилсан. Өнөөг хүртэл залуу үеийнхний эх оронч үзэл, ёс суртахууны хүмүүжлийг төлөвшүүлэхэд чухал үүрэг гүйцэтгэж буй талаар судлаачид тэмдэглэсэн байна.

2023 онд ЮНЕСКО-гоос Туркменийн яруу найрагч, сэтгэгч Махтумгулы  Фраги-гийн мэндэлсний 300 жилийн ойг тэмдэглэх тогтоол гаргаж, түүнийг “Дэлхийн дурсамж”-ийн бүртгэлд оруулсан хэмээн ЕТГ-аас мэдээлэв.