Хойд Солонгосын Гадаад хэргийн яамны албаны хүмүүс Өмнөд Солонгосыг агаарын хил зөрчсөн гэж буруутгажээ. Тодруулбал, Өмнөд Солонгос Пёньяны дээгүүр гурван хоногийн турш нисгэгчгүй онгоц хөөргөж, суртал ухуулгын хуудас тараасан гэж үзэж байна. Хэрэв дахин ийм төрлийн асуудал гаргавал нэн даруй хариу арга хэмжээ авна гэж мэдэгджээ.

Мөн довтолгооны бүх төрлийн хариу өгөхөд бэлэн байх болно гэж мэдэгдэлд онцлон тэмдэглэсэн байна. Тус улсын төрийн мэдээллийн сониноор дамжуулан мэдэгдэл гаргасан бөгөөд нисгэгчгүй онгоц, суртал ухуулгын зургийг хавсаргасан байна.

Харин Өмнөд Солонгосын арми ямар нэгэн нисгэгчгүй онгоц илгээгээгүй гэдгээ онцлон, хүмүүсийн аюулгүй байдалд заналхийлсэн тохиолдолд хатуу хариу арга хэмжээ авна гэдгээ мэдэгдэв. Өмнөдийн хэвлэлүүд нисгэгчгүй онгоцнуудыг ямар нэгэн бүлгийн идэвхтнүүд илгээсэн байж магадгүй гэжээ.