Монголын бүх цаг үеийн хайрын шилдэг дуунд зүй ёсоор тооцогдох “My love” дууг дуучин Э.Энх-Эрдэнэ “New star” студийн 20 жилийн ойд зориулан шинэчилсэн хувилбараар дуулжээ. Сонсогчдын нэг хэсэг нь “My love” дууны шинэ хувилбарыг таатай хүлээж авсан бол зарим нь шүүмжилж байгаагаа олон нийтийн сүлжээнд илэрхийлж байна.

Тэгвэл дуучин Э.Энх-Эрдэнэ “Энэ дууг дахин хэзээ ч сонсохгүй цор ганц хувилбараар нэг л удаа дуулна. “UG Arena”-гийн тайзнаас өөр газар дуулахгүй” гэв.

Дууны үгийг дуучин BX бичиж, аяыг нь С.Гантөр хийсэн бөгөөд 15 жилийн өмнө цацагдаж, тухайн үедээ хит болж байв. Дашрамд сонирхуулахад, Youtube хуудсанд 15 жилийн өмнө BX-ийн дуулсан хувилбараар цацагдсан клипний бичлэгийг өнөөг хүртэл 990 мянган хүн үзжээ. Харин баргил хоолойт Э.Энх-Эрдэнэ тав хоногийн өмнө энэ дууг дуулж, Youtube сувгаар цацахад 800 гаруй мянган хүн сонсоод байна.