Эрүүл мэндийн яам, Сэтгэцийн эрүүл мэндийн төвөөс өнөөдөр /2024.10.10/ цаг үеийн асуудлаар мэдээлэл өглөө. 

Эрүүл мэндийн газрын Нийгмийн эрүүл мэндийн бодлогын газрын дарга Л.БАТТӨР:

-Олон улсад жил бүр аравдугаар сарын 10-ний өдрийг сэтгэцийн эрүүл мэндийн өдөр болгон тэмдэглэдэг. Энэ жил сэтгэцийн эрүүл мэндийн өдрийг ажлын байран дахь сэтгэцийн эрүүл мэнд гэдэг сэдвийн хүрээнд зохион байгуулж байгаа. Ажил олгогчдын хувьд ажлын байрны аюулгүй орчныг бүрдүүлж, ажилчдынхаа сэтгэцийн эрүүл мэндэд анхаарснаар бүтээмжтэй ажиллах, үйлчлүүлэгч сэтгэл ханамжтай байх нөхцөл бүрддэг.

Үйлчлүүлэгч бол хаан гэдэг асуудал нэн тэргүүнд байдаг ч ажил олгогч нар ажилтнууддаа түлхүү анхаарал хандуулснаар бүтээмж өсөх боломжтой.

Ажлын байран дахь сэтгэцийн эрүүл мэндэд анхаарал хандуулах асуудал бол удирдлагын манлайлал, байгууллагын соёл, уур амьсгалаас ихээхэн хамаардаг зүйл. Тиймээс бид ажилтнуудынхаа сэтгэл ханамжид байнга анхаарал хандуулах нь зүйтэй. Сүүлийн гурван жилийн хугацаанд эрт илрүүлгийг нийт хүн амд хийсэн. 6-14 настай хүүхдүүдийн мөн сэтгэцийн эрүүл мэндийн байдлыг үнэлэхэд судалгаанд хамрагдсан гурван хүүхэд тутмын нэг нь сэтгэцийн асуудалтай байна гэж гарсан.

Нас баралтай шалтгааны гуравдугаарт амиа хорлолт, осол аваарын эндэгдэл багтдаг.

Энэ бүхэн сэтгэцийн эрүүл мэндэд анхаарах зайлшгүй шаардлагатайг илтгэж байна.

"НАЙМАН ХҮН ТУТМЫН НЭГ НЬ СЭТГЭЦИЙН ЯМАР НЭГЭН ЭМГЭГТЭЙ БАЙНА’

СЭМҮТ-ийн захирал Г.АНХБОЛД:

-Дэлхийн эрүүл мэндийн байгууллагын судалгаагаар 2022 оны байдлаар найман хүн тутмын нэг нь сэтгэцийн тулгамдсан асуудалтай байна гэж гарсан. Дэлхий даяар нийт  970 сая хүн эмгэгтэй байна гэж гарсан байна. Монгол Улсын хувьд 2013-2019 онд хийгдсэн судалгаагаар сэтгэл түгших эмгэг 18.2 хувьтай, органик бус нойрны эмгэг 18.5 хувьтай, архаг ядаргаа 16.2 хувь, тайлбарлаж болохгүй биеийн зовиур 16.9 хувь гарсан. Ялангуяа Улаанбаатарт сэтгэцийн гаралтай стрессийн эмгэг маш өндөр хувьтай гарсан байдаг.

Хүн дийлэнх цагаа ажлын байран дээрээ өнгөрөөдөг. Тиймээс ажлын байрны сэтгэцийн эрүүл мэндийг дэмжих нь маш чухал болоод байна.

Дэлхий нийтээр тэмдэглэдэг сэтгэцийн эрүүл мэндийн өдрөөр дэвшүүлж байгаа сэдвийг хүн бүр анхаарч, өөрийн болоод ажилчдынхаа эрүүл мэндэд анхаарах нь нэн чухал болоод байгаа юм.