АНУ-ын сонгуулийн өдөр Исламын улс бүлэглэлийн нэрийн дор халдлага үйлдэж, үймээн тарихаар төлөвлөж байсан гэх афган эрийг Холбооны мөрдөх товчоо баривчилжээ. Сэжигтэн этгээд нь 27 настай Насир Ахмад Тавхеди гэгч бөгөөд Оклахомад амьдардаг. Тэрбээр 2021 оны есдүгээр сард эхнэр, хүүхдийн хамт цагаачлалын тусгай визээр АНУ-д ирсэн аж.

Холбооны мөрдөн товчооны дарга Кристофер Врэйн мэдэгдсэнээр "ISIS"-аас сэдэл авсан афган эр сонгуулийн өдөр халдлага үйлдэхийн тулд галт зэвсэг нөөцлөхийг завджээ. Насир Ахмад Тавхедиг гадаадын террорист байгууллагад дэмжлэг үзүүлэхийг завдсан, хуйвалдаан зохион байгуулсан, гэмт хэрэг, терроризм үйлдэхэд ашиглах галт зэвсэг, сум худалдан авахыг оролдсон хэрэгт буруутгаж байна. Тэрбээр насанд хүрээгүй хүүхдүүд болон өөр афган иргэнтэй үгсэн хуйвалдсан байжээ. Мөн тэрбээр Вашингтон дахь хяналтын камерууд, Цагаан ордон, Вашингтон хөшөөний ойролцоох вэб камеруудыг хянахыг завдсан. Цаашилбал, галт зэвсгийн хууль нь арай сул байдаг мужийн тухай хайж, судалж байжээ.

Түүнийг халдлагад ашиглахын тулд АК-47 автомат буу хайж байсан гэж эрх баригчид үзэж байна. Буу худалдаж авахын тулд тэрбээр энэ Даваа гаригт хамтран хуйвалдагчийн хамтаар Холбооны мөрдөх товчооны нууц ажилтнуудтай холбогджээ. Энэ худалдан авалтынх нь дараа түүнийг баривчилсан байна.