ОХУ-ын химийн байлдааны анги болон тус ангийн командлагчийн эсрэг Их Британи хориг арга хэмжээ авчээ. Химийн байлдааны ангийг дэлхийн нэгдүгээр дайны үед ашигладаг байсан амьсгал боомилогч хорт хийг Украины нутаг дэвсгэрт хаясан гэж буруутгаж байна. ОХУ хориотой хорт бодисыг дайны талбарт хаяснаар олон улсын хууль тогтоомжийг ноцтой зөрчиж буйг Их Британийн Гадаад хэргийн сайд Дэвид Ламми хэллээ. Тиймээс өөрийн эрх мэдэл хүрэх хэмжээнд Оросын хөнөөлтэй үйл ажиллагаатай тэмцэнэ гэжээ.

АНУ өнгөрсөн тавдугаар сард Украины цэргүүдийг нуугдсан байрлалаас нь гаргахын тулд хлоропикрин цацсан гэж Оросыг буруутгасан.

Хлоропикрин нь дэлхийн нэгдүгээр дайны үед өргөнөөр хэрэглэж байсан бодис бөгөөд нүд, арьсыг цочроож, бөөлжиж, суулгахад хүргэдэг. 1997 онд баталсан Химийн зэвсгийн тухай конвенцийн дагуу олон улсад уг бодисыг хориглосон байдаг бөгөөд ОХУ ч үүнд гарын үсэг зуржээ.

ОХУ-ын Радиологийн хими, биологийн хамгаалалтын албаны даргаар 2017 оноос хойш ажилласан дэслэгч генерал Игорь Кириллов нь химийн зэвсгийн талаар худал мэдээлэл түгээх Кремлийн гүйцэтгэгч байсан гэж Их Британи мэдэгдэв. Игорь Кириллов Украиныг химийн зэвсэг ашигласан гэж буруутгаж, Оросын телевизээр байнга гардаг ажээ. Тэрбээр Даваа гаригт ОХУ-ын Батлан ​​хамгаалах яамны хэвлэлийн бага хурлын үеэр үг хэлэхдээ украин цэргүүд хлоропикрин ашиглаж байгаа гэжээ. Мөн Украины Авдийвка хотын ойролцоо хорт бодис үйлдвэрлэдэг лаборатори олсон гэж мэдэгдсэн байна.

Москва дахь Их Британийн батлан ​​хамгаалахын атташе асан Жон Форманы хэлснээр дэслэгч генерал Кириллов өмнө нь Covid-19-ийн талаар ч худал мэдээлэл тарааж байжээ. Тэрбээр Оросыг сүйрүүлэхийн тулд АНУ Covid-19-ийн вирусийг үүсгэсэн гэж мэдэгдэж байсан. "Түүний сүүлийн гурван жилийн хугацаанд хэлсэн үг бүр нь худал байсан. Би түүнийг Оросын Жанжин штабын хамгийн инээдтэй гишүүдийн нэг гэж үздэг. Тэр бол худал хуурмагийг түгээхийн тулд үе үе гарч ирдэг, хүүхэлдэйн киноны азгүй дүр" гэж Жон Форман хэлжээ.

Гэвч ОХУ-ын ерөнхийлөгч Путин 2021 оны долдугаар сард дэслэгч генерал Кирилловыг эх орондоо онцгой гавьяа байгуулсных нь төлөө Хөдөлмөрийн баатар медалиар шагнаж байжээ.

Өдгөө 54 настай Кириллов Кремлийн химийн дайны стратегийг боловсруулахын зэрэгцээ "TOS-2" зэвсгийн системийн хөгжүүлэлтийг удирдаж байсан. "TOS-2" нь термобарик пуужингаар зэвсэглэсэн ачааны машин бөгөөд ойролцоогоор 20 км-ын тусгалтай. "TOS-2" ачааны машинуудыг Украинд хэдийнэ байршуулсан гэх мэдээлэл байна.