ОХУ-ын ерөнхийлөгч Путины 72 насны төрсөн өдөр аравдугаар сарын 7-ны Даваа гаригт болжээ. Энэ өдөр Оросын цэцэрлэг, сургуулийн хүүхдүүд бичлэг хэлбэрээр Путинд мэндчилгээ дэвшүүлсэн байна. Ойролцоогоор 11 мужийн 30 орчим сургуулийн хүүхдүүдийн ерөнхийлөгчид баяр хүргэсэн бичлэг Вконтакте цахим хуудсанд нийтлэгджээ.

Ростов муж дахь нэгэн сургуулийн хүүхдүүд Путин гэдэг үгийг үүсгэн жагсч зогссон байна. Мөн "Дэлхийн шилдэг ерөнхийлөгч манай улсыг захирч байгаад бид баяртай байна" гэж сургуулийн зүгээс мэдэгджээ. Алс Дорнод Приморийн бүс нутгийн нэгэн цэцэрлэгт ерөнхийлөгчийн үүргийн талаар хичээл оржээ. Харин Хойд Кавказын Бүгд найрамдах Дагестаны их сургуулийн оюутнууд "Эрх мэдэл" гэсэн үгийг үүсгэн жагсч, Путины төрсөн өдрийг онцолжээ.

Украин дахь дайн эхэлснээс хойш Оросын сургуулиуд хүүхдүүдэд цэргийн боловсрол олгох болсон. Өнгөрсөн долоо хоногт л гэхэд "Чухал яриа" нэртэй эх оронч үзлийг төлөвшүүлэх хичээлийг Путины уриалгаар цэцэрлэгийн хүүхдүүдэд орсон байна.

Сургууль, цэцэрлэгээс гадна дайныг дэмжигч иргэд өөр янз бүрийн хэлбэрээр Путинд төрсөн өдрийн мэнд хүргэжээ. Тухайлбал, дайныг дэмжигч хэсэг блоггер "Путинд зориулав" гэсэн бичигтэй пуужинг пуужин харвагчид суурилуулж буй цэргүүдийн бичлэгийг нийтлэв. Мөн Москва дахь "VDNKh" үзэсгэлэнийн танхимын гадаа "Ерөнхийлөгчид төрсөн өдрийн мэнд хүргэе" гэсэн бичигтэй улаан шүхэр бүхий 5000 орчим хүн цуглажээ.

Дашрамд дурдахад, багш, сурган хүмүүжүүлэгчдийг доромжилсон хүмүүст их хэмжээний торгууль ногдуулах тухай хуулийн төслийг ОХУ-ын эрх баригчид хэлэлцэж буй. Төрийн думын санаачилсан энэхүү хууль нь төрийн албан хаагчид, тэр дундаа багш нарыг хүчирхийлэл, үл хүндэтгэх байдлаас хамгаалах өргөн хүрээний хүчин чармайлтын нэг хэсэг юм. Шинэ хуулийн төслийн тухай мэдээлэлтэй зэрэгцэн цэцэрлэг, сургуулиуд ерөнхийлөгч Путинд төрсөн өдрийн мэнд хүргэжээ.