Украины талд тулалдсан 72 настай америк эр Стивен Жеймс Хаббардад ОХУ-ын шүүхээс зургаан жил 10 сарын хорих ял оноолоо. Мичиган мужийн иргэн тэрбээр 2014 оноос хойш Украины зүүн хэсгийн Изюм хотод амьдарсан. Оросоос Украинд довтолсон эхний сард Хаббард хөлсний цэргийн гэрээ байгуулж, сарын 1000 ам.доллараар цалинжсан боловч мөн оныхоо дөрөвдүгээр сард Оросын цэргүүдэд баривчлагдсан байна.

Хаббард хэргээ хүлээсэн гэж Оросын төрийн хэвлэлүүд мэдээлсэн. Гэвч түүний эгч Патрисия Хаббард Фокс үүнд эргэлзэж буйгаа өнгөрсөн сард мэдэгджээ. Эгч нь хэлэхдээ "Хаббард Оросыг дэмжигч үзэлтэй байсан. Тэр бүү хэл энэ насандаа зэвсэг барьсан байх магадлал багатай" гэжээ.

Хаббард Даваа гаригт шүүхийн шийдвэрийг сэтгэл хөдлөлгүйгээр сонссон бөгөөд сэтгүүлчдэд тайлбар өгөхөөс татгалзсан. Харин түүний өмгөөлөгч шүүхийн шийдвэрийг давж заалдана гэж мэдэгдэв.

Ар гэрийнхнийх нь мэдэгдсэнээр Хаббард сүүлийн жилүүдэд дандаа гадаадад амьдарчээ. Япон, Кипр зэрэг улсад англи хэл зааж байсан тэрбээр 2014 онд Изюмд нүүж ирж, украин эмэгтэйтэй хамтран амьдрах болсон. Энд амьдрах хугацаандаа орос, украин хэл сураагүй, нутгийн иргэдтэй ч холбоо харилцаатай байгаагүй ажээ.