Улсын арслан Э.Оюунболд өнгөрсөн наймдугаар сард согтууруулах ундааны зүйл хэрэглэсэн үедээ нийслэлийн Хан-Уул дүүрэгт байрлах "Их наяд" худалдаа төвийн ойролцоо бусдын биед халдсан гэх мэдээлэл цацагдсан. Хуулийн байгууллагаас Э.Оюунболдын тээврийн хэрэгсэл жолоодох эрхийг нэг жилийн хугацаагаар хасч, 400 мянган төгрөгөөр торгосон байдаг.

Тодруулбал, Баянзүрх дүүргийн Цагдаагийн газраас Э.Оюунболдод зодуулсан талаар нэр бүхий иргэнээс гаргасан гомдолд Эрүүгийн хуулийн 11.6 дугаар зүйлийн 1 /Хүний эрүүл мэндэд хөнгөн хохирол санаатай учруулах/-д зааснаар хэрэг бүртгэлтийн хэрэг нээн мөрдөн шалгах ажиллагаа явуулахад шүүх эмнэлэгийн шинжээчийн дүгнэлтээр тухайн иргэний биед гэмтлийн зэрэг тогтоогдоогүй байна.
Тиймээс хэргийг хаах саналтай дүүргийн прокурорын газарт хүргүүлж, прокуророос хэрэг бүртгэлийг хааж, Э.Оюунболдын бусдын биед халдсан үйлдлийг Зөрчлийн тухай хуулийн 5.3 дугаар зүйлд заасан “Хүний биед гэмтэл учруулахгүйгээр халдах” зөрчлийн шинжтэй гэж үзэн 2024 оны аравдугаар сарын 4-ний өдөр харьяа эрх бүхий байгууллагад шилжүүлжээ.