УИХ дахь Ардчилсан нам, УИХ дахь МАН-ын бүлгүүд өнөөдөр /2024.10.07/ хуралдах ёстой ч гишүүд нь орон нутгийн сонгуульд мордоцгоожээ. Энэ долоо хоногийн Баасан гариг буюу аравдугаар сарын 11-нд орон нутгийн сонгуулийн санал хураалттай тул УИХ-ын гишүүд нам, эвслээс нэр дэвшигчдээ дэмжихээр орон нутгийг зориод байна.

УИХ-ын дарга Д.Амарбаясгалан өнгөрсөн долоо хоногт “УИХ-ын гишүүдэд чөлөө олгохгүй. Чөлөө хүссэн бичиг өгснийгээ чөлөөтэй гэж бодоод явцгааж байна.  20 орчим гишүүн чөлөө хүссэн, нэгэнд нь ч чөлөө өгөөгүй. Долоо хоногийн хоёрхон өдөрт УИХ-ын чуулган хуралдаж байхад цагтаа ирдэггүй энэ асуудалд цэг тавина. УИХ-ын гишүүдийн ирцийн мэдээллийг нэртэй устай нь гаргана. Сонгогчид нь хараг” гэх ширүүн үг хаяглаж байсан юм. Гэвч төд удалгүй УИХ дахь МАН-ын бүлэг УИХ-ын чуулганы нэгдсэн хуралдаанаар хэлэлцэж байсан Монгол Улсын 2025 оны төсвийн тухай хуулийн төслөөр Баасан гаригт тав хоногийн завсарлага авсан. Завсарлага нь бусад улс төрийн нам, эвсэлд ч далим болж, Бямба гаригаас эхлээд УИХ-ын гишүүд орон нутагт ажиллаж, сонгуулийн PR –т идэвхтэй орцгоосон гэж хэлж болно.

Тэгвэл УИХ-ын даргын дэргэдэх зөвлөл энэ долоо хоногт Байнгын хороо, УИХ-ын чуулганы нэгдсэн хуралдааныг хийхгүй байхаар зохицуулалт хийсэн нь гишүүдийн хувьд бүтэн долоо хоног чих амар орон нутагт ажиллах боломжийг олгоод байна.

Г.ХОРОЛ