Хамас бүлэглэл Газын зурваст дайрснаас хойш бүтэн нэг жил өнгөрчээ. Газын зурвас дахь дайныг зогсоохыг уриалж дэлхийн олон улс оронд иргэд жагсч байна. Өнгөрсөн амралтын өдрүүдээр АНУ, Их Британи, Герман тэргүүтэй хэд хэдэн улсад жагсаал болжээ.

Газын эрүүл мэндийн албаныхны мэдээлснээр бүтэн жилийн хугацаанд амиа алдагсдын тоо 41 мянга давсан байна. Өдгөө амьд үлдсэн хүмүүс хүмүүнлэгийн ноцтой хямралыг даван туулж байна. Анх 251 хүнийг барьцаалснаар мөргөлдөөн эхэлж байсан бол өнөөдрийн байдлаар барьцааны 97 хүн сураггүй хэвээр байна.

Тэгвэл Хамасын ахлах хэлэлцээч Халил Аль-Хайя Ням гаригт мэдэгдэл хийхдээ "Бид уян хатан хандсан ч Израиль гал зогсоох хэлэлцээрийг няцаасаар байна" гэжээ. Израилийн ерөнхий сайд Беньямин Нетаньяху Хамасыг устгасны дараа л дайн дуусна гэж өмнө нь мэдэгдсэн билээ.

Газын зурвасын мөргөлдөөн хүрээгээ тэлж, Ливанд мөн тогтворгүй байдал үүссэн. Гэвч дэлхий нийт Газын зурвас болон Ливанд ялгаатай стандартаар хандаж байна гэж Халил Аль-Хайя шүүмжилжээ.