Өмнөд Солонгосын ерөнхийлөгч асан Мүн Жэ Иний охин Мүн Да-хэ өнгөрсөн амралтын өдрөөр согтуугаар тээврийн хэрэгсэл жолооджээ. Цагдаагийн байгууллагын мэдэгдсэнээр Мүн Да-хэ Ням гаригийн шөнийн 02:51 цагт Сөүлийн Ёнсан дүүрэгт эгнээ байр солих үедээ такситай мөргөлдсөн байна. Таксины жолооч хөнгөн бэртсэн. Мүн Да-хэгийн цусан дахь алкохолийн хэмжээ 0.14 бүхэл байсан бөгөөд энэ нь жолоо барихад зөвшөөрөгдөх 0.08 бүхлээс давсан үзүүлэлт юм.

Түүний тарьсан хэрэг Өмнөд Солонгосын эрх баригч Ардын хүчний намын шүүмжлэлд өртөв.

Тус намын төлөөлөгч Ким Жан-кём энэ талаар цахим сүлжээндээ бичихдээ "Аав нь ерөнхийлөгч байхдаа согтуугаар тээврийн хэрэгсэл жолоодох нь хүн амины хэрэг болно гэж хэлснийг Мүн Да-хэ сонсох хэрэгтэй байсан юм. Аав нь утгагүй дэмий юм хэчнээн ярьсан байж болох ч сонсох хэрэгтэй зүйлээ сонсох л байсан юм" гэжээ.

Мүн Жэ Ин 2018 оны аравдугаар сард ахлах зөвлөхүүддээ хандан "Согтуугаар тээврийн хэрэгсэл жолоодсоноос улбаатай ослыг алдаанд тооцохгүй. Энэ бол үхэлд хүргэх, бусдын амь амьдралыг бүрэн сүйтгэх зүйл" гэж хэлээд, энэ төрлийн хэрэгт илүү хатуу шийтгэл оногдуулахыг уриалж байв.

Сөрөг хүчин болох Ардчилсан нам энэ хэргийг цочирдон хүлээж авчээ. Намын бүлгийн дарга Пак Чан-дэ болгоомжлонгуй байдлаар "Ийм зүйл болох ёсгүй байсан юм. Энэ хэрэгтэй холбоотойгоор нэмж хэлэх зүйл алга" гэжээ.