Жүдо бөхийн залуучуудын дэлхийн аварга Тажикстаны Душанбе хотод болж, өндөрлөлөө. Энэ удаагийн тэмцээнд таван тивийн 67 орны 531 тамирчин өрсөлдөв. Монгол Улсаа төлөөлөн эрэгтэй зургаа, эмэгтэй найман тамирчин гээд нийт 14 жүдоч эх орноосоо мордсон.

Үүнээс эмэгтэйчүүдийн -52 кг-д өрсөлдсөн Б.Уранзаяа долдугаар байр эзэлж, энэ жилийн залуучуудын дэлхийн аваргад оролцсон Монголын багийн хамгийн өндөр амжилтыг үзүүлэв.

Тэмцээний сүүлийн өдөр буюу өчигдөр/2024.10.06/ холимог багийн барилдаан болж, Монголын баг Бразил, Туркийг ялж, шуугиан тарьсан. Улмаар хагас шигшээ болон хүрэл медалийн төлөө Япон, Солонгосын багуудад дараалан ялагдаж, тавдугаар байрт оржээ.

Медалийн чансаагаар Япон улс тэргүүлсэн бол тэдний араас Хятад, Франц, Узбекистан, Өмнөд Солонгос, Гүрж, Австри тэргүүтэй улсууд удаалжээ. Монголын хувьд ганц шагналт долдугаар байртай 29 дүгээрт эрэмблэгдсэн аж. Хятадын залуучуудын шигшээ баг энэ удаагийн дэлхийн аваргад цахиур хагалж, жүдо хөгжиж буй гэдгээ баталлаа гэж жүдо сонирхогчид ярьж байна.

Тэмцээний дараа Монголын багаа төлөөлөн явсан, гавьяат тамирчин Х.Цагаанбаатар дараах зүйлсийг цахим хуудаснаа нийтэлжээ. Тэрбээр "Уучлаарай. Хичээсэн, даанч чадсангүй. Залуучуудын дэлхийн аварга шалгаруулах тэмцээний холимог багийн төрөлд, Монгол Улс анх удаа медалын төлөө өрсөлдлөө. Дэлхийн ранкийн хоёрдугаарт байсан Бразилын багийг хожиж, Туркийн багийг мөн хожиж шигшээ дөрөвт үлдсэн боловч, Япон, Солонгосын багт ялагдаж, тавдугаар байранд орлоо.