Израилийн цохилтын дараа амиа алдсан Хассан Насраллагийн залгамжлагч гэж үзэж буй ахлах удирдагч Хашем Сафиеддин өнгөрсөн Баасан гаригаас /2024.10.04/ хойш ор сураггүй, холбоо тасарсан талаар Ливаны аюулгүй байдлын эх сурвалж мэдэгдэв. Саффиеддин нь талийгаач Насраллагийн үеэл төдийгүй зэвсэгт бүлэглэлийн гүйцэтгэх зөвлөлийн даргаар ажилладаг.

Ливаны аюулгүй байдлын зөвлөлийн Дорса Жаббари түүнийг Израилийн бөмбөгдөлтөд өртсөн байх вий гэдгээс эмээж байна. Тэрбээр "Aljazeera" агентлагт хэлэхдээ Ливан болон Хезболлагийн албаны хүмүүс Баасан гаригийн өглөө агаарын халдлагад өртсөн. Тэдний цогцсыг яаралтай гарган авах хэрэгтэй байна. Тэнд Сафиеддин байгаа эсэхэд эргэлзэж байна" гэжээ.

Мөн "Түүнийг Израиль онилж байгаа. Хэрвээ амиа алдсан бол Хезболла бүлэглэлийн толгойлогчийн залгамжлагчийн асуудал дэврэх болно. Гэхдээ бид албан ёсны мэдээлэл гаргах хүртэл бусад хэвлэл мэдээллийн мэдээнүүд хуурамч гэдгийг санах хэрэгтэй. Бид Саффиеддинтэй холбоо тасарсан ч амьд байх магадлалтай гэж бодож байна" гэжээ.