Хойд Солонгост олзлогдсон Ёкота Мегүмигийн 60 насны төрсөн өдрийн ойг тохиолдуулж өчигдөр /2024.10.05/ хандивын тоглолт зохион байгуулагджээ. Мегүми нь 1977 онд 13 настайдаа Нийгата хотод Пёньяны тагнуулд олзлогдож, одоог хүртэл ор сураггүй байгаа юм. Тухайн үед Мегүми хичээлээ тараад гэр лүүгээ харьж явсан.  Хандивын тоглолтыг Мегүмигийн хамт сурч байсан ангийн нөхөд нь зохион байгуулсан. Тэд хэзээ нэгэн өдөр Мегүмитэй уулзана гэх итгэл найдварыг тээж энэхүү тоглолтыг зохион байгуулсан гэдгээ хэлжээ. Түүнчлэн, тоглолтын үеэр Мегүмигийн ээж Ёкота Сакигийн илгээсэн видео мессежийг тоглуулсан байна.

Тус бичлэгт Саки хэлэхдээ "Охин минь одоо 60 нас хүрчээ. Энэ олон жил өнгөрч байхад яагаад охиныг минь аварч чадахгүй байгааг гайхдаг" гэсэн байна. Мөн олон нийтээс Мегүмиг аврахад туслалцаа үзүүлэхийг гуйжээ.

Тоглолтын үеэр Мегүмиг таньдаг, мэддэг хүмүүс түүний талаарх дурсамжаа хуваалцсан байна. Нэгэн цагт Хойд Солонгост Мегүмигийн хамт олзлогдсон Сога Хитоми хандивын тоглолтод мөн адил оролцсон. Тэрбээр 2002 онд Японд буцаж ирсэн бөгөөд Хойд Солонгост байхдаа Мегүмитэй хамт эх хэлээрээ чимээгүйхэн дуулдаг байсан талаараа дурссан байна.

Сога хэлэхдээ "Хэзээ нэгэн цагт Мегүми буцаж ирвэл хамтдаа караоке орж, дуулдаг байсан дуугаа хамгийн чангаар дуулахыг хүсч байна" гэжээ. 1970-1980 оны хооронд Японы 17 гаруй иргэн Хойд Солонгост олзлогдсон байдаг. Эдгээр хүмүүсийн дөнгөж тав нь 2002 оны дээд хэмжээний уулзалтын үеэр эх орондоо ирж чаджээ. Үлдсэн 12 хүний амьд байгаа эсэх болон хэзээ Японд эргэн ирэх нь тодорхойгүй хэвээр байна.