"Мета" компанийн гүйцэтгэх захирал Марк Зукерберг дэлхийн хоёр дахь баян хүн болжээ. "Bloomberg"-ийн тэрбумтнуудын индексийн сүүлийн үеийн мэдээгээр тэрбээр 206 тэрбум ам.долларын хувийн хөрөнгөтэй болох нь тогтоогдсон байна. Тоо баримтаас харахад Зукерберг 2024 онд хувийн хөрөнгөө 78.1 тэрбум ам.доллараар нэмэгдүүлснээр "200 тэрбумтны клуб" гэгддэг эгнээнд орж, Элон Маскийн дараа орох дэлхийн хамгийн баян хүн болсон.

"Tesla" болон "X" компанийн гүйцэтгэх захирал Элон Маск 256 тэрбум ам.долларын хөрөнгөтэй, "Амазон" компанийн үүсгэн байгуулагч Безос 205 тэрбум ам.долларын хөрөнгөтэй юм. Тансаг зэрэглэлийн “LVMH” брэндийн гүйцэтгэх захирал Арно “200 тэрбумтны клуб”-д жагсаж байсан ч хөрөнгийн хэмжээ нь 193 тэрбум ам. доллар болсноор дэлхийн топ баячуудын эгнээнээс байр ухарчээ. Өдгөө 40 настай Зукерберг баялгийнхаа ихэнх хэсгийг “Meta Platforms”-ийн хувьцаанаас олдог. “Meta” (META) компанийн хувьцаа 2024 онд 72 гаруй хувиар өссөн. Тус компанийн хувьцааны ханш Баасан гаригт /2024.10.04/ гэхэд 2,26 хувиар өсч, 595,94 ам.долларт хүрснээр дээд амжилт тогтоожээ.

“Мета” нь “Facebook, Instagram, Threads” гэх мэт алдартай олон нийтийн мэдээллийн платформууд, мөн шууд мессеж илгээх “WhatsApp” программыг ажиллуулдаг.