Украины өмнөд хэсэгт орших Запорожье атомын цахилгаан станцын хамгаалалтын албаны дарга машиндаа дэлбэрэлтэд өртөж, нас барсныг Москва, Киевийн эрх баригчид Баасан гаригт мэдэгдлээ. Орон нутгийн цагаар 07:00 цагийн орчимд машин дэлбэрсэн бөгөөд тэр үед Андрей Короткый дотор нь суусан байжээ.

Украины цэргийн тагнуулын "HUR" агентлаг ослын газрын бичлэгийг хуваалцжээ. Бичлэгийн эх сурвалж тодорхойгүй бөгөөд цагаан өнгийн "SUV" машин дэлбэрч, эвдэрсэн харагдана.

Томоохон гэмт хэргүүдийг шалгадаг ОХУ-ын Мөрдөн байцаах хороо Запорожьед болсон ослын дараа хүн амины хэрэг үүсгэн, шалгаж эхэлжээ. Мөрдөн байцаах хороо хохирогчийн нэрийг бус зөвхөн албан тушаалыг нь дурдаад, эмнэлэгт гэмтлээ даалгүй нас барсан гэж мэдэгдэв.

"HUR" агентлаг Андрей Короткыйг Оросын эрх баригчдад урваж, Украины эсрэг үйлдэх гэмт хэрэгт нь тусалсан гэж буруутгажээ. Тодруулбал, Андрей Короткый мэргэжил нэгт нөхдийнхөө хувийн мэдээллийг Оросын эрх баригчидтай хуваалцаж, Кремлийг дэмжих зорилгоор тогтмол арга хэмжээнүүдийг зохион байгуулдаг байжээ. Тэрээр Энерходарт Нэгдсэн Орос намаас томилогдсон Москва хотын зөвлөлийн гишүүн байсан.

Мөн "HUR" агентлаг цахим хуудсандаа "Дайны гэмт хэрэгтэн бүр шударга шийтгэл хүлээнэ гэдгийг анхааруулъя" гэж бичжээ.