Украины арми Баасан гаригт ОХУ-ын Воронеж муж дахь шатахуун хадгалдаг байгууламжид цохилт өгсөн тухай мэдэгдлээ. Энэ нь Анна тосгоны ойролцоо орших Аннанефтпродакт шатахууны агуулах юм. Байгууламжийн босоо танкуудын дор хаяж нэг нь агаарын цохилтод өртөж, гал гарчээ. Тухайн танк нь хоосон байсан учир хохирол учраагүй гэдгийг Воронеж мужийн захирагч Александр Гусев хэлэв.

Мөн өдөр Пермь муж дахь Осенци тосгоны аж үйлдвэрийн бүсэд шатахууны агуулахад гал гарсан байна. Гэхдээ галын шалтгаан хараахан тодорхой болоогүй. Гал 10 мянган метр квадрат талбайг хамарчээ. Нийт 60 гаруй алба хаагч, 19 техник хэрэгсэлтэй ажилласнаар галыг бүрэн унтрааж чаджээ. Пермь дэх агуулахын гал болгоомжгүй байдал юм уу цахилгааны доголдлоос болж гарсан гэж үзэж байна.