Нийтийг бухимдуулсан олны анхаарлыг татсан нэг хэрэг бол нүүрсний хулгай. Он дамжин яригдаж, олон хүн холбогдсон гэх тус хэрэгт нийтийн эрх ашигт халдахуйц асуудал их байсан учир Хянан шалгах түр хороог ч гаргасан.

Тэгвэл нүүрсчид, нүүрсний хулгайн хэрэгт холбогдогчид тус түр хорооны дарга УИХ-ын гишүүн Б.Энхбаярт өс санаж, шоронд орохгүйн тулд шүүхээр дамжуулж хууль бус үйлдэл гаргаж байна гэв.

Тодруулбал, УИХ-ын гишүүн, Хянан шалгах түр хорооны дарга Б.Энхбаяр өөрийн цахим хуудастаа, нүүрсчид нүүрсний сонсгол хийгдэж, илчлэгдсэндээ хорсч, хулгайгаа дахиж хөндүүлэхгүй байж хэргээ замхруулах, цаашилбал эрх мэдлээсээ салж шоронд орохгүй байхын тулд шүүхээр дамжуулж нүүрсний сонсгол зохион байгуулсан УИХ-ын Түр хорооны даргаас өшөө авч, айлгаж амыг нь үдэх ажиллагаа хийсээр байгаа. Өнөөдөр нүүрсчид ялж байгаа. Тэд ард түмнийг мартамхай, нэхэл хатуу биш, нүглийн нүдийг гурилаар аргалчихна гэдэгтээ итгэж байгаа.

Шүүхийн энэ асуудал нь хувь иргэн хоорондын асуудал биш Монгол улсын Үндсэн хуульд заасан институт хоорондын, эрх мэдэл хуваарилах онол ба хэрэгжилтийн хувь заяатай холбогдох жишиг прецедент болох үр дагавартай гэж үзэж шүүхэд хандсан тайлбар, хүсэлтээ нээлттэй тавьж байна гэжээ.

НҮҮРСНИЙ СОНСГОЛООР 3.1 САЯ ХУУДАС МАТЕРИАЛ ШАЛГАСАН

Үндсэн хуулийн 28.2 дахь хэсэг, УИХ-ын тухай хуулийн 30 дугаар зүйлийн 30.1 дэх хэсэг, УИХ-ын хяналт шалгалтын тухай хуулийн 33 дугаар зүйлийн 33.1 дэх хэсэг, 34.2, 34.3 дахь хэсгийг тус тус үндэслэн УИХ-ын 2023 оны долдугаар сарын 6-ны 63 дугаар тогтоолоор нүүрсний хэргийг хянан шалгах түр хороо байгуулагдсан. Тус түр хороо нь стратегийн ач холбогдол бүхий ашигт малтмалын томоохон ордод үйл ажиллагаа явуулж байгаа "Эрдэнэс Тавантолгой" ХК, "Тавантолгой" компаниудад хуулиар тодорхойлсон бүрэн эрхийн хүрээнд хяналт шалгалт хийж гүйцэтгэсэн байдаг. Тухайлбал, хяналт шалгалтын хүрээнд түр хороо нь "Эрдэнэс Тавантолгой" ХК, "Тавантолгой" ХК-ний нүүрс олборлолт, борлуулалт, тээвэрлэлт, экспорт болон бусад бараа үйлчилгээ худалдан авах үйл ажиллагаатай холбоотой 3,1 сая гаруй хуудас баримт материалыг хамруулсан хяналт шалгалтыг 72 хоногийн хугацаанд хийж, нээлттэй сонсголыг хоёр үе шаттай зохион байгуулсан.

Сонсголын үр дүнд үндэслэж, хэд хэдэн санал дүгнэлтийг ч гаргасан байдаг.

Гэвч хэн нэгэнд хариуцлага тооцсон тохиолдол одоог хүртэл гараагүй. Гэтэл нүүрсний хулгайчид шүүхтэй хамтарч тус түр хорооны даргыг айлган сүрдүүлж байна гэлээ.