Японы Үндэсний цагдаагийн газрын харьяа Киото мужийн цагдаагийн газрын дарга Шираи Тошиаки эрх мэдлээ ашиглан бусдыг дарамталсан хэргээр албан тушаалаасаа огцрох болжээ. Тодруулбал, Шираи Тошиаки наймдугаар сард ярилцлага өгөх үеэрээ доод албан тушаалтандаа "Ална шүү" гэж үгийг хэлсэн нь ажлаасаа халагдах үндэслэл болсон байна.

Шираи Тошиакиг аравдугаар сарын 14-ний өдрөөс эхлэн Цагдаагийн ерөнхий газрын тамгын газарт шилжүүлэх болсон байна.

Түүний хэлсэн үг хоёр шалтгаанаар бусдыг дарамталсанд тооцогдоно гэж Үндэсний цагдаагийн газар мэдэгджээ. Нэгдүгээрт, түүний хэлсэн үг ажлын орчныг улам дордуулж байна. Хоёрдугаарт, цагдаагийн ажилтанд итгэх иргэдийн итгэлийг алдагдуулж байна гэжээ. Шираи Тошиаки Пүрэв гаригт буруугаа хүлээж, зохисгүй үг хэлсэндээ маш их харамсаж байна гэжээ.

Шираи 1991 онд Токиогийн их сургуулийн Эдийн засгийн факультетийг төгссөнийхөө дараа Үндэсний цагдаагийн газарт ажилд орсон. Тэрбээр Хоккайдо мужийн цагдаагийн хоёрдугаар хэлтсийн дарга, Тояама мужийн цагдаагийн газрын дарга, Нийслэлийн цагдаагийн газрын ерөнхий хэрэг эрхлэх газрын даргаар ажиллаж байгаад 2023 оны гуравдугаар сараас Киотод шилжин иржээ.