Иранаас Израиль руу Мягмар гаригт дор хаяж 180 пуужин харважээ. Үүний улмаас хэд хэдэн хүн шархадсан бөгөөд хариу арга хэмжээ авна гэж Израиль мэдэгдэв. Тодруулбал, Израилийн ерөнхий сайд Беньямин Нетаньяху халдлага болсон орой мэдэгдэл хийхдээ "Тэд маш том алдаа хийлээ. Үүнийх нь хариуг өгөх болно" гэжээ.

Ираны халдлагын өмнө Израилийн арми Ливан дахь Хезболлагийн байгууламжид хэд хэдэн цохилт өгсөн. Мөн Ливаны өмнөд хэсэгт хуурай замын хязгаарлагдмал дайралт хийснээр Хезболлад үзүүлэх шахалтыг нэмэгдүүлжээ. Ливаны хилийн ойролцоох гэр орноосоо дүрвэсэн иргэдийг буцаж ирэхэд аюулгүй болтол цохилтоо үргэлжлүүлнэ гэж Израиль мэдэгдсэн.

Израиль, Иран улсууд олон жилийн турш сүүдрийн дайн хийж байсан ч шууд мөргөлдсөн түүх ховор.

Ираны тал Мягмар гаригийн халдлагаа Хезболлагийн удирдагч Хассан Насралла, Хувьсгалт гвардийн генерал Аббас Нилфорушан нарын амийг хөнөөсний хариу гэж тайлбарлажээ. Мөн долдугаар сард Израилийн халдлагад өртөж амиа алдсан Хамас бүлэглэлийн дээд удирдагч Исмаил Ханиегийн нэрийг ч дурдсан байна.

Израилийн эрх баригчид Мягмар гаригийн өглөө Ливаны өмнөд хэсгийн хүмүүсийг Авали голын хойд хэсэгт, хилээс 60 км зайд нүүлгэн шилжүүлэхийг анхааруулсан. Сүүлийн нэг жилийн хугацаанд хил дамнасан халдлагуудаас болж хилийн бүс эзэнгүйдсэн. Гэхдээ энэ удаад нүүлгэн шилжүүлэлтийн цар хүрээг илүү хол тогтоосон нь Израиль улс Ливан руу цэргээ гүн оруулж магадгүй гэсэн айдсыг төрүүлээд байна.