Японы шинэ ерөнхий сайд Шигэрү Ишиба сонгуульд ялалт байгуулахынхаа өмнө "Азийн НАТО"-ыг байгуулах санаачлага гаргасан. Азийн аюулгүй байдлыг бэхжүүлнэ гэж үзэж буй түүний энэ санаачлагыг АНУ, Энэтхэг улсууд хүлээн зөвшөөрөөгүй. Энэтхэгийн Гадаад хэргийн сайд Субрахманьяам Жайшанкар Мягмар гаригт мэдэгдэл хийхдээ "Дели Ишибагийн үзэл санаатай санал нэг биш байна" гэдэг үгээр эргэлзээгээ илэрхийлжээ.

Түүнчлэн Японы Гадаад хэрэг, Батлан хамгаалахын сайд нар Лхагва гаригт энэ санаачлага дээр ажиллаагүй гэдэг мэдэгдлийг хийв.

"Энэ санаа ирээдүйд хэрэгжиж болох юм. Ххарилцан батлан ​​хамгаалах үүрэг хүлээх механизмыг Ази тивд шууд бий болгоход хэцүү" гэж Японы Гадаад хэргийн сайд Такэши Иваяа хэлжээ. Энэ санаачлага Хятадад чиглэсэн эсэхийг түүнээс асуухад тэр "Тухайлан аль нэг улсыг онилоогүй" гэж хариулжээ. Харин Батлан хамгаалахын сайд Накатани "Ерөнхий сайд өчигдөр зааварчилгаа өгөхдөө НАТО-ийн ази хувилбар байгуулах тухай юу ч дурдаагүй" гэсэн байна. Накатани нь Ишибагийн шинэхэн томилсон Батлан хамгаалахын сайд юм.

Энэ мэт санаачлага ярихад одоо хэтэрхий эрт байна гэдгийг өнгөрсөн сард АНУ-ын Төрийн нарийн бичгийн даргын Зүүн Ази, Номхон далайн асуудал эрхэлсэн туслах Даньел Критенбринк хэлсэн юм.