Хойд Солонгосоос 10 орчим жилийн өмнө дүрвэсэн иргэн автобус хулгайлж, нутаг буцах гэж байгаад Өмнөдийн цагдаа нарт баригджээ. Тэрбээр Мягмар гаригт хоёр Солонгосыг тусгаарладаг Нэгдлийн гүүрээр гаталсан бөгөөд цэргүүдийн хориглолтыг үл тоон автобусаараа хаалт мөргөсөн байна.

Солонгосын хойг 70 гаруй жилийн өмнө хуваагдсанаас хойш 34 мянга орчим хойд солонгос иргэн Өмнөд рүү дүрвэсэн. Тэднээс Хойд Солонгос руу буцахыг хүсч буй нь тун цөөн. Гэвч нэр нь тодорхойгүй, 30 гаруй насны уг эрэгтэй Өмнөдөд асуудал, бэрхшээлтэй тулгарсан тул харихыг хүссэн гэжээ.

Тэрбээр Мягмар гаригийн 01:00 цагт Өмнөдийн Пажу хот дахь гараажаас автобус хулгайлаад, хил давахыг завдсан ч хагас цагийн дараа баривчлагдсан байна. Гараажийн хяналтын камерын бичлэгийг харахад тэрбээр зугтах тээврийн хэрэгслээ хайж, хэд хэдэн машины хаалгыг онгойлгохыг завджээ. Тухайн хүн согтууруулах ундаа, мансууруулах бодис хэрэглэсэн байсан эсэх нь тодорхойгүй.

Тэрбээр Өмнөд Солонгост амьдрах хугацаандаа Пажу болон өөр хэд хэдэн хотод ажиллаж амьдарчээ. Энэ хугацаандаа багагүй төлбөр, торгууль хуримтлуулсан аж.

Өмнөд Солонгосын иргэд болон дүрвэгсэд засгийн газрын зөвшөөрөлгүйгээр Хойд Солонгосын хил нэвтрэх хориотой. Өмнөдөд ирсэн Хойд Солонгосын дүрвэгсдэд автоматаар иргэншил олгодог. Тус улс жил бүр 1000 гаруй дүрвэгч Хойд Солонгосоос хүлээж авдаг. Харин 2021-2022 онд Хойд Солонгост буцсан дүрвэгсэд нь 31 байжээ. Дүрвэгсэд Өмнөд Солонгост ирээд сард дунджаар 2.3 сая вон буюу 1740 ам.долларын орлого олдог.