ОХУ-ын ерөнхийлөгч Владимир Путин өнөөдрөөс /2024.10.01/ эхлэн оны эцэс хүртэл үргэлжлэх намрын цэрэг татлагаар 133 мянган алба хаагчийг татах зарлиг гаргав. "Российская газета"-д нийтлэгдсэн тогтоолд дурдсанаар "Холбооны хуулийн дагуу 18-30 насны, нөөцөд хамрагдаагүй 133 мянган иргэнийг цэргийн албанд татна" гэжээ. Тэдгээр нь хугацаат цэргийн алба хаагчид байх бөгөөд алба хаах үндсэн хугацаа нь 12 сар хэвээрээ байна.

ОХУ-ын Цэрэг татлагын газрын дарга, дэд адмирал Владимир Цимлянский хугацаат цэргийн алба хаагчдыг шинэ бүс нутгуудад цэргийн тусгай ажиллагаанд оролцуулахгүй гэдгийг онцолжээ. ОХУ 2022 оны сүүлээр Украины зүүн өмнөд хэсгийн зарим газрыг өөртөө нэгтгэснээ шинэ бүс нутаг гэж нэрлэсэн билээ.

Ерөнхийлөгч Путин өнгөрсөн сард Оросын армийн тоог 180 мянган цэргээр нэмэгдүүлж, 1.5 сая идэвхтэй албан хаагчтай болгох тушаал өгсөн. Ингэснээр ОХУ нь Хятадын дараа дэлхийд хоёрдугаарт орох өргөн бүрэлдэхүүнтэй армитай болох юм.