Токиогийн Шибүяа вокзалын ойролцоо гудамжинд архи согтууруулах ундаа хэрэглэхийг өнөөдрөөс /2024.10.01/ эхлэн нэг жилийн хугацаатай хориглож байна. Тодруулбал, Японы засгийн газар 2023 онд "Covid-19"-ыг томуугийн өвчлөл гэх ангилалд оруулснаас хойш гудамжинд архидан согтуурах явдал залуус болон гадаадын иргэд дунд газар авчээ. Ялангуяа Шибүяа дүүргийн оршин суугчид вокзалын ойролцоо олон тооны хүмүүс архидан согтуурч, жуулчид зориулалтын бус газар хог хаяж байна гэж гомдол гаргадаг аж.

Шибүяа тойрогт 2019 онд "Halloween" болон шинэ жилийн баярын үеэр гудамжинд архи согтууруулах ундаа хэрэглэхийг хориглох захирамж гаргасан. Гэсэн хэдий ч баяр ёслолоос бусад үед залуус тус тойрогт цугларч архи согтууруулах ундаа хэрэглэсээр байв. Тиймээс баярын өдрүүдэд архи согтууруулах ундаа хэрэглэхгүй байх хоригийг шинэчилж, бүтэн нэг жилийн турш үргэлжлүүлэх болсон байна.

Шинэчилсэн захирамжийн дагуу өнөөдрийн 18:00 цагаас гудамж, олон нийтийн газар согтууруулах ундаа хэрэглэхийг хориглох юм. Архи согтууруулах ундаа хэрэглэхийг Шибүяа тойргоос Мияшита цэцэрлэгт хүрээлэнгийн зүүн хэсэг болгон өргөтгөж байна. Одоогийн байдлаар хоригийг зөрчсөн хүнийг хэрхэн шийтгэх нь тодорхойгүй байгаа ч Японд энэ төрлийн хориг арга хэмжээ авч буй анхны тохиолдол юм.