Израилийн агаарын дайралтаас зугтахын тулд Ливанаас 100,000 орчим хүн Сири рүү дүрвэсэн гэж НҮБ-ын дүрвэгсдийн асуудал эрхэлсэн агентлаг (UNHCR) мэдэгдлээ. Тус агентлагийн тэргүүн Филиппо Гранди Даваа гаригт хэлэхдээ "Израилийн агаарын довтолгооноос дүрвэн Ливанаас Сири рүү нэвтэрсэн хүний тоо 100 мянгад хүрсэн. Цаашид улам нэмэгдэх хандлагатай байна" гэжээ. Мөн сүүлийн хоёр хоногийн хугацаанд хилээр гарсан дүрвэгсдийн тоо өмнөх долоо хоногоос хоёр дахин нэмэгдсэн байна. Эдгээр хүмүүсийг дэмжих зорилгоор орон нутгийн засаг захиргаа болон Сирийн Улаан хавирган сар байгууллага дөрвөн хилийн шалган нэвтрүүлэх дээр ажиллаж байгаа аж.

НҮБ-ын дүрвэгсдийн комиссын мэдээлснээр Баасан гариг/2024.09.27/ гэхэд 30,000 хүн Сири рүү нэвтэрсэн байна.

Сири дэх тус байгууллагын төлөөлөгч Гонзало Варгас Ллосагийн хэлснээр тэдний 80 орчим хувь нь Сирийн иргэд, 20 хувь нь Ливаны иргэд байжээ. Тэрбээр "Хэдийгээр зарим эрэгтэй хүмүүс дүрвэж байгаа ч нийт дүрвэгсдийн талаас илүү хувь нь хүүхэд, эмэгтэйчүүд, өсвөр насны хүүхдүүд байна" гэж сэтгүүлчдэд хэлжээ.