Нийслэлийн Сонгинохайрхан дүүргийн 192 дугаар цэцэрлэгийн хүүхдүүдэд долоо хоног муудсан махаар хоол хийж өгсөн гэх гомдлыг өнгөрсөн есдүгээр сард /2024.09.10/ зарим эцэг эхчүүд гаргасан. Мэдээллийн дагуу албаныхан шалгалт хийсэн бөгөөд цэцэрлэгийн хоолны дээжээс авсан шинжилгээний дүгнэлт гарчээ. Лабораторийн шинжилгээгээр хоолны махнаас илэрсэн бичил биетийн тоо хэмжээ их гарсан гэдгийг мэргэжлийн байцаагч мэдээллээ.

Энэ асуудалтай холбоотойгоор тус цэцэрлэгийн эрхлэгч болон тогооч, няравыг ажлаас нь чөлөөлсөн байдаг. Зөрчлийн хэрэг нээн шалгаж байгаа бөгөөд хуулийн дагуу гурван сая төгрөгөөр торгохоор болжээ.

Цэцэрлэгийн хүүхдүүдэд бөөлжих, суулгах шинж тэмдэг илэрсэн гэдгийг эцэг эхчүүдийн төлөөлөл өмнө нь хэлж байв.

Энэ талаар өмнө нь нийслэлийн Сонгинохайрхан дүүргийн Боловсролын хэлтсийн дарга А.Дүүдээгээс тодруулахад, тус цэцэрлэгийн эрхлэгч болон тогооч, няравыг өчигдөр үүрэгт ажлаас нь чөлөөлсөн. Боловсролын яам болон нийслэлийн Боловсролын газрын холбогдох мэргэжилтнүүд өнөөдөр цэцэрлэгт бүрэн шалгалтыг хийж байна. Гал тогоонд хийсэн хоолноос дээж авч, шинжилгээ хийлгэхээр өгсөн. Одоогийн байдлаар хоолноос хордлого авч, эмнэлгийн тусламж авсан гэсэн гомдол мэдээлэл бүртгэгдээгүй байна" гэдгийг мэдээлж байв.