"Miss Universe" тэмцээн 1952 онд анх зохиогдож байжээ. Анхны тэмцээнээс 10 гаруй жилийн өмнө төрсөн 80 настай Чой Сун Хва өдгөө тус тэмцээний хамгийн өндөр настай оролцогчоор түүхэнд бичигдэх магадлалтай байна. Тэрбээр энэ сарын эхээр “Miss Universe Korea” тэмцээний финалд шалгарчээ. Өнөөдөр тэр өөр 31 оролцогчтой өрсөлдөж, арваннэгдүгээр сард Мексикт болох тэмцээнд Өмнөд Солонгосыг төлөөлөх эсэхээ шийднэ.

"Miss Universe" байгууллага хэдэн 10 жилийн турш насны хязгаарыг 18-28 гэж хатуу тогтоосон байсан. Гэвч 2024 оноос эхлэн насны дээд хязгаарыг цуцалжээ. Үндэсний хэмжээний миссийн тэмцээнүүд толгой байгууллагын удирдамжийг дагаж мөрдөх ёстой. Өнөөдрийг хүртэл "Miss Universe" тэмцээнд оролцсон хамгийн өндөр настай хүн бол 40 настай Мальта Беатрис Нжояа юм.

Энэ жил Канад, Аргентин улсын дотоодын тэмцээнүүдэд 58, 60 настай оролцогчид оролцсон. Гэхдээ тэд арваннэгдүгээр сард болох финалд шалгарч чадаагүй.

Өмнөд Солонгосын миссийн тэмцээнийг зохион байгуулагчид "Мөрөөдөхөд нас хамаагүй" сэдвийн дор сурталчилгаагаа цацжээ. Мөн усны хувцастай үзүүлбэрийг тэмцээнээс хассан байна.

“Miss Universe Korea” тэмцээн нь Чойгийн хувьд анхны миссийн тэмцээн юм. Гэхдээ тэр Өмнөд Солонгосын загварын ертөнцөд хэдийнэ хөлөө олсон нэгэн. Тэрбээр тэтгэвэртээ гарчихаад өр зээлээ төлөхийн тулд 72 наснаасаа загвар өмсөж эхэлжээ.