АНУ-ын ерөнхийлөгч асан Дональд Трамп, Украины ерөнхийлөгч Зеленский нар Баасан гаригт Нью-Йорк хотноо Трамп цамхагт уулзжээ. Энэ үеэр Трамп Украины ерөнхийлөгчид хандан Оросын дайныг зогсоох цаг болсон гэж хэлэв. Харин Зеленский хариуд нь "Бид дайн зогсоно, Путин ялахгүй гэдэг дээр ижил үзэл бодолтой байна. Би тантай ялалтын төлөвлөгөөгөө хэлэлцэх болно" гэжээ.

Трамп сонгуулийн кампанит ажлынхаа үеэр Зеленскийг удаа дараалан шүүмжилж байсан. Энэ удаагийн уулзалт ч болох эсэх нь тодорхойгүй байжээ. Тодруулбал, Пүрэв гаригийн орой Трамп өөрийн цахим хуудсандаа Зеленскийн бичсэн "Бид биечлэн уулзаж, бүрэн ойлголцох нь чухал" гэсэн мессежийн скрийншотыг нийтэлснээр тэдний уулзалтын тов баталгаажсан аж.

Зеленскийтэй олон жил санал зөрөлдсөн ч сайн харилцаатай хэвээр байгаа гэдгээ Трамп онцолсон байна. Мөн тэрбээр "Таны мэдэж байгаачлан би ерөнхийлөгч Путинтэй ч маш сайн харилцаатай. Хэрвээ би сонгуульд ялвал энэ асуудлыг нэн даруй шийдвэрлэх болно" гэжээ.

Энэ уулзалтаас олон зүйл ойлгож авснаа Трамп хэлжээ. "Бидний хэн хэн нь дайныг дуусгахыг хүсч байна. Хэн хэн нь шударга яриа хэлэлцээ хүсч байна. Дайн зогсох ёстой, ерөнхийлөгч Зеленский ч зогсоохыг хүсч байна. Путин ч бас зогсоохыг хүсч байгаа гэдэгт би итгэлтэй байна. Тэгэхээр энэ бол сайхан нийцэл" гэж Трамп хэлэв.

Харин Зеленский "Путин маш олон хүний амийг хөнөөлөө. Дайныг зогсоо гэж түүнийг шахамдуулах бүхнийг хийх хэрэгтэй. Тэр манай нутаг дэвсгэр дээр байгаа шүү дээ" гэжээ. Дараа нь Зеленский телеграмдаа "Бид маш утга учиртай уулзалт хийлээ. Украин дахь дайн зогсох ёстой гэдэгт бид санал нэгдсэн. Путин ялах боломжгүй. Украин ялах ёстой" гэж бичсэн байна. Тэрбээр Дональд Трампийг Украинд айлчлахыг урьсан бөгөөд ерөнхийлөгч асан очно гэдгээ илэрхийлсэн аж.

Трамп "Truth" цахим хуудсандаа "Би ерөнхийлөгч болохгүй л бол энэ дайн хэзээ ч зогсохгүй. Дэлхийн гуравдугаар дайн болж даамжрана" гэж бичжээ.