УИХ-ын Ёс зүй, дэгийн байнгын хорооны дарга Б.Баярбаатар, УИХ-ын гишүүн Ц.Мөнхтуяа, М.Нарантуяа нар энэ долоо хоногт “Наран туул” худалдааны төвд ажиллаж, гурилын бөөний жижиглэнгийн үнэ, тээвэрлэлт, ачилтын бусад зардлууд, мөн эрэлт, нийлүүлэлтийн талаарх зах зээлийн мэдээллүүдийг цуглуулж, ажиллажээ.

Тус худалдааны төвд үйл ажиллагаагаа явуулж буй нийт 20 гаруй бөөний цэгээс нийслэл болон орон нутгийн хэрэглэгчид гурил худалдан авдаг бөгөөд сүүлийн үед борлуулалт багассаныг худалдаа эрхлэгчид сануулсан байна.

Эдгээр цэгүүдэд дотоодын үйлдвэрүүдээс нийлүүлж буй 25 кг-ын савлагаатай дээд зэргийн гурил дунджаар 45000-68000 төгрөгийн хооронд худалдаалж байгаа бол нэгдүгээр зэргийн гурилын үнэ 43000-55000 төгрөгийн хооронд хэлбэлзэж байна. Импортоор орж ирж буй гурилын кг тутмын үнэ нь хямд хэдий ч хэрэглэгчдийн хувьд амт, чанарыг нь харгалзан дотоодын үйлдвэрийн гурилыг түлхүү сонгодог аж.

Ажлын хэсгийн гишүүд улаанбуудайн тариалалтаас эхлээд үйлдвэрлэл, түгээлт, борлуулалт гэхчилэн хэрэглэгчдийн гар дээр очих хүртэлх процессын өртөг зардал, зах зээлд оролцогч талуудын байр суурийг нэгтгэж, санал дүгнэлт боловсруулах юм байна.

Өмнө нь дээрх УИХ-ын гишүүд төвийн бүсийн тариаланчид, дотоодын үйлдвэрлэгчидтэй уулзжээ.

Сануулахад, өмнөх парламентын үед УИХ-ын гишүүн Ж.Бат-Эрдэнээр ахлуулсан ажлын хэсэг мөн л гурил, будаа зэрэг хүнсний гол нэрийн бүтээгдэхүүний үнэ бодитой эсэхийг тодруулахаар зах, худалдааны төвүүдэд ажиллаж байв.

Гэвч үр дүн гараагүй, харин ч  гурилын үнэ өссөөр эцэст нь Засгийн газар импортоор орж ирэх гурилын үнийг татвараас чөлөөлөх хуулийн төслийг санаачлан, УИХ-аар батлуулсан. Иймээс шинээр бүрдсэн УИХ-аас томилогдсон ажлын хэсэг импортын гурилыг татвараас чөлөөлөх хууль иргэдийн амьдралд эерэг нөлөө үзүүлсэн эсэхийг шалгаж байгаа нь энэ юм.

Г.ХОРОЛ