Хойд Солонгост хоёр оронтой тоотой тэнцэхүйц тооны тэсрэх бөмбөг бүтээх хангалттай ураны нөөц байх магадлалтайг Сөүлийн Тагнуулын алба мэдэгдлээ. Энэ сарын эхээр тус улсын удирдагч Ким Жон Ун цөмийн зэвсгийн нөөцөө нэмэгдүүлэх зорилтоо дахин баталгаажуулсан билээ. Үүнтэй холбоотойгоор Хойд Солонгос улсад зэвсгийн чанартай уран үйлдвэрлэдэг нууц байгууламж байгаа гэх ховорхон мэдээлэл өгсөн.

Өмнөд Солонгосын Тагнуулын алба парламентад хаалттай мэдээлэл хийхдээ "Ким Жон Ун байгууламжийн талаарх мэдээллийг ил болгосон нь АНУ-ын ерөнхийлөгчийн сонгуулийн өмнө Вашингтоныг эсэргүүцэж буй мэдэгдэл юм. Эдийн засгийн тэмцэл гүнзгийрч буй энэ үед Хойд Солонгос цэргийн амжилтаа харуулах зорилготой байна" гэлээ.

Хойд Солонгост 70 кг плутони болон тодорхойгүй хэмжээний ураны нөөц байгаа гэж таамаглаж байна. Гэхдээ эдгээр нь дор хаяж хоёр оронтой тоотой дүйцэхүйц хэмжээний тэсрэх бөмбөг үйлдвэрлэхэд хангалттай хүрэлцэх аж.

Ким Жон Уны есдүгээр сарын 13-нд зочилсон уран баяжуулах байгууламжийн байршлыг Хойд Солонгосын төрийн хэвлэлд мэдээлээгүй. Өмнөдийн таамаглаж буйгаар уг байгууламж нийслэл Пёньяны ойролцоох Кансон хотод байх магадлалтай. Хойд Солонгосын цөмийн гол цогцолбор нь Йонбен хотод байдаг. Сүүлд нэмэгдсэн байгууламжийг оролцуулаад нийтдээ уран баяжуулах хоёр газартай болж байна. Энэ хоёроос гадна дахин өөр газар ч байж магадгүй гэж шинжээчид таамаглаж байна.