Гэр бүл, хөдөлмөр, нийгмийн хамгааллын сайд Л.Энх-Амгалан Нийгмийн даатгалын сангаас хуримтлал үүсгэж орон сууцны зээл руу шилжүүлэх болон тус яамнаас цаашид хийх хэрэгжүүлэх ажил, төсөв мөнгөний талаар өнөөдөр мэдээлэл хийлээ. Ирэх 2025 оны улсын төсвөөс Гэр бүл, хөдөлмөр, нийгмийн хамгааллын яамны хийж хэрэгжүүлэх ажилд 4.5 их наяд төгрөг төсөвлөжээ. Үүнээс 2.6 их наяд төгрөгийг хүүхдийн мөнгө болон халамжид зарцуулах аж.

Нийгмийн даатгалын сангаас тэтгэвэр олгоход гарч буй зөрүүг тус яамнаас гаргах юм байна. Үүнд 1.4 их наяд төгрөгийн зардал гаргах юм байна.

Гэр бүл, хөдөлмөр нийгмийн хамгааллын сайд Л.Энх-Амгалан энэ үеэр, “Нийгмийн даатгалын сан алдагдал их гарч байгаа. Цаашдаа Монгол Улс тэтгэврийн даатгалын сан гэж байх уу, үгүй юу гэдэг асуудал дээр тулж ирээд байна. Бодит байдлыг ярих цаг ирээд байна. Улсын төсвөөс авч буй нийгмийн даатгалын татаас нэмэгдэж байна.

Өөрөөр хэлбэл, 2025 онд улсын төсвөөс 1.4 их наяд төгрөг авч байж тэтгэврээ тавьж байна. 2026 онд 2.5 их наяд, 2027 онд 2.9 их наяд төгрөгийн татаас улсын төсвөөс авч тэтгэврээ тавих эрсдэл үүсээд байгаа.

Ирэх жил тэтгэвэр, цалинг зургаан хувиар нэмэхээр тооцоолж, УИХ-д төсөв өргөн барьсан. Мөн тэтгэврийг жил бүр инфляцитай уялдуулж нэмэх эрх зүйн зохицуулалттай болсон. Энэ жилээс нийгмийн даатгалын багц хууль хэрэгжиж эхэлсэн. Үүнтэй уялдуулж томоохон шинэчлэл хийж байгаа. Тухайлбал, нийгмийн даатгалын шимтгэл төлж буй хувь хүн, ААН-ийн нийгмийн даатгалын шимтгэлийн хувиас нэрийн дансанд хуримтлуулж эхэлсэн.

Мөн нөхөр эсвэл эхнэрээ алдсан ахмадуудын хувьд үлдсэн эхнэр эсхүл нөхрийн тэтгэврийг 20 хувиар нэмэгдүүлж олгоно.

Ажил олгогчдын зүгээс нийгмийн даатгалын шимтгэл өндөр, үүний үр ашгийг зарим хүмүүс хүртэж чадахгүй байна гэх шүүмжлэлийг хэлдэг. Тэгвэл цаашдаа нийгмийн даатгалын шимтгэлийг дагасан үйлдвэрлэлийн болон ажилгүйдлийн даатгал зэргийг ажил олгогчид өгөөжтэй байх зохицуулалт хийж байгаа. Ирэх оны нэгдүгээр сараас хэрэгжиж эхлэх нийгмийн даатгалын багц хуульд дараах шинэчлэлийг хийх аж. Тэтгэврийг инфляцитай уялдуулж жил бүр нэмнэ" гэв.

Мөн хуримтлалын санг Гэр бүл, хөдөлмөр, нийгмийн хамгааллын яам хариуцдаг болсон. Энэ хүрээнд хуримтлалын сангаас эрүүл мэнд, боловсрол, орон сууцны зээлд зэрэгт зарцуулах аж.

Хувийн тэтгэврийн тогтолцоог бий болгох зохицуулалтыг хийх гэнэ. Тодруулбал, тэтгэвэрт гараад олон эх үүсвэрээс тэтгэвэр авдаг болгох ажлыг хийж байгаа ажээ.