АНУ-ын ерөнхийлөгч Жо Байден Украинд 7.9 тэрбум ам.долларын цэргийн нэмэлт тусламж үзүүлж, тус улсын байлдааны талбарт үзүүлэх чадварыг нэмэгдүүлнэ гэж мэдэгдэв. Тэрбээр Пүрэв гаригт Украины ерөнхийлөгч Зеленскийтэй Цагаан ордонд уулзахдаа энэ талаараа ярьжээ. Байден "Бид тулааны талбарт Украины байр суурийг бэхжүүлэх ёстой. Украиныг амжилтад хүрэхэд нь туслахын тулд хамтдаа хичээх хэрэгтэй" гэв. Мөн тэрбээр Зеленскийд хандан  "Дайнд Орос дийлэхгүй. Украин ялна. Бид алхам тутамдаа таны талд зогсох болно" гэсэн байна.

Тусламжийн багцад алсын тусгалын пуужин, нэмэлт "Patriot" агаарын довтолгооноос хамгаалах батарей, системд зориулсан пуужингууд багтсан гэж Цагаан ордноос мэдээлэв.

Байден мөн ирэх сард Украины батлан ​​хамгаалахын холбоо барих бүлгийн удирдагчдын түвшний уулзалтыг Германд зохион байгуулж, Киевт үзүүлэх дэмжлэгийн талаар ярилцана гэж мэдэгджээ.