"The Hu" хамтлаг Европ дахь аялан тоглолтоо өндөрлөлөө. Тэд 2024 оны эхний аялан тоглолтоо Австралиас эхэлж байсан бол 2024 оны есдүгээр сарын 4-26-нд Европын орнуудаар аялан тоглолтоо хийж дуусгалаа. Тодруулбал, "Хишигтэн" нэртэй аялан тоглолтоо есдүгээр сарын 4-26-ны өдрүүдэд Финланд, Эстони, Латви, Польш, Герман, Чех, Австри, Итали, Хорват, Швейцарь, Франц, Испани зэрэг улсуудад хийжээ.

Хамтлагийн залуус эх орондоо хэсэг хугацаанд амарч, "Нар Сар" нэртэй бүрэн хэмжээний тоглолтоо хийхээс гадна Үндэсний баяр наадмын нээлтийн концертод оролцсон.

Мөн хамтлагийн продюсер, хүннү рок урсгалыг үндэслэгч Б.Дашдондог болон тус хамтлагийн АНУ дахь албан ёсны лэйблтэй харилцан тохиролцсоны үндсэн дээр "The Hu" хамтлаг долдугаар сарын 20-нд "АРА" фестивальд шоу тоглолтоо хийж, Монголынхоо сонсогчдод ая дуугаа хүргэсэн.

Хамтлагийн залуус 2016 онд байгуулагдсанаасаа хойш богино хугацаанд олон улсад танигдаж чадсан Монголын амжилттай хамтлаг. Их эзэн Чингис хааны мэндэлсний ой, өвлийн тэргүүн сарын шинийн нэгэн Монгол бахархлын өдөр /2019.11.27/  "The Hu" хамтлагийнханд Монгол төрийн дээд шагнал, тэргүүн зэргийн Чингис хаан одонг хүртээсэн билээ. Анх 2005 оноос Чингис хаан одонг олгож эхэлсэн бөгөөд энэ жил “Хүннү рок” урсгалаар уран бүтээл туурвидаг “The Hu” хамтлагийн продюсер Б.Дашдондогт тус одонг гардуулсан юм.