Ерөнхий сайд Л.Оюун-Эрдэнэ өнөөдөр /2024.09.26/ Яармагийн гүүрний зорчих хэсгийн нээлтэд оролцсон. Энэ үед хотын дарга Х.Нямбаатар түүнд одоо болон цаашид хэрэгжих замын ажлуудыг мөн дулааны станцтай холбоотой төлөвлөгөөт ажлуудыг танилцуулсан юм. Үүний дараагаар Ерөнхий сайд сэтгүүлчдийн асуултад хариуллаа.

Тэрбээр, эрчим хүчний үнийг нэмэхээс өөр аргагүй. Хуучин тогтолцоогоороо явсаар байвал илүү алдагдалд хүрнэ гэдгийг онцолсон юм.

Ерөнхий сайд хэлэхдээ "Эрчим хүчний үйлдвэрлэж байгаа өртөг, худалдаж байгаа өртгөөс хэд дахин үнэтэй. Тиймээс энэ байдлаар явсаар байвал дандаа татаас өгч явна гэсэн үг. Эрчим хүчний салбар цаашид энэ хэвээр татаастай явсаар байвал аж үйлдвэрээ боож эхэлнэ. Мөн барилгажилтыг боож эхэлнэ. Тэгэхээр одоо бидэнд сонголт тулгарч байна. Эрчим хүчний салбарыг хуучны орос технологиор явуулсаар байх уу эсвэл дэлхийн дэвшилтэт технологи руу шилжүүлж, цэвэр эрчим хүчний ногоон шилжилтийг хийж эхлэх үү? Мэдээж үе шат, хугацаа гэж бий. Тэр тухайд дотоодын нийт бүтээгдэхүүн болон иргэдийн амьжиргаа, үйлдвэрлэгч нарын асуудал зэргийг харгалзана. Энэ асуудлуудыг тооцож үзээд мэргэжлийн байгууллагын санал дээр үндэслэж, өвдөлт өгсөн ч гэсэн эрчим хүчний салбараа аварна. Тэгэхгүй бол бид өөрөө өөрсдийгөө хуураад л явлаад байна гэсэн үг. Тийм учраас үнэ тодорхой хэмжээнд нэмэгдэх магадлалтай. Үнийн индекс ямар түвшинд нэмэгдэх вэ гэдгийг УИХ дээр мэргэжлийн байгууллагууд болон байнгын хороодуудтай аж ахуй нэгжүүд маань сайн ярих ёстой" гэсэн юм.

УИХ-ын ээлжит чуулган ирэх долоо хоногт эхэлнэ. Чуулганаар ирэх 2025 оны төсвийг хэлэлцэх бөгөөд эрчим хүчний үнийг хэзээ, хэдэн хувиар нэмж өөрчлөх тооцоо судалгаа ил болох юм.

Одоогоор цахилгааны үнэ, шөнийн тарифын хөнгөлөлттэй холбоотой шийдвэр эцэслэгдээгүй байна.