Сүмогийн холбоо өнөөдөр/2024.09.25/ албан ёсоор Оносатог озэки цол хүртсэн болохыг зарлаж, ёслол хийжээ. Дээд зиндаанд ердөө есөн башё барилдсан түүнийг ийм богино хугацаанд озэки цол хүртсэнд сүмо сонирхогчид олзуурхаж байна.

Түүнээс өмнө Шовагийн эрин үед буюу 1926 онд ёкозүна Хагүрояама дээд зиндаанд 12 башё барилдсаныхаа дараа озэки цол хүртэж байжээ.

Ишикава мужаас гаралтай Оносато ярихдаа "Би сүмогийн ертөнц дэх цор ганц сүмочин болмоор байна. Би башё бүр дээр сайн барилдаж, аль болох хурдан цол ахихыг хүссэн. Зорилгодоо хүрсэндээ баяртай байна" гэв.

Оносато Аки башёд 13 даваа, хоёр унаатай түрүүлсэн билээ. Тэрбээр сүүлийн гурван башёд нийт 34 даваа авч, озэки цолны албан бус болзлыг хангасан юм.

Оносатогийн дэвжээний багш озэки асан Кисэносато ярихдаа "Түүнийг ийм эрт цол ахина гэж бодсонгүй. Одоо тэр башё бүр дээр арав болон түүнээс дээш даваа авах хэрэгтэй боллоо. Түүнээс ихийг хүлээж байгаа хүмүүс олон бий. Түүнийг бэлтгэлээ улам сайн хийнэ гэж найдаж байна" гэлээ.

Оносато ёслолын төгсгөлд "Энэ цолонд хүрснээр өөрийгөө улам хичээх болно. Үр дүнг одооноос эхлэн харуулах болно. Кюүшү башёд сайн бэлдэх болно. Бүх зүйл эндээс эхэлж байна. Би улам өндөр гарахыг зорино" гэжээ.