УИХ-ын гишүүн, Гэр бүл, хөдөлмөр, нийгмийн хамгааллын сайд Л.Энх-Амгалан яам болон агентлагийн удирдлагуудын хамт Иргэд, олон нийттэй харилцах 11-11 төвд ажиллаж, иргэдтэй уулзаж санал хүсэлтийг сонсов.

Засгийн газрын хуралдаанаар, Иргэд, олон нийттэй харилцах 11-11 төвд иргэдээс ирүүлсэн санал, хүсэлт, өргөдөл, гомдолд хууль тогтоомжийн хүрээнд хариу өгч, төрийн үйлчилгээг шуурхай үзүүлэхийг Засгийн газрын гишүүд, агентлагийн дарга, аймаг, нийслэлийн Засаг дарга нарт үүрэг болгосон. Үүний хүрээнд Гэр бүл, хөдөлмөр, нийгмийн хамгааллын сайд Л.Энх-Амгалан тус төвд ажиллаж иргэдтэй уулзсан байна. Энэ үеэр, иргэдийн зүгээс дараах асуудлуудыг голчлон хэлж байна.

Тодруулбал, ахмадуудын эрүүл мэнд, урьдчилан сэргийлэх үйлчилгээг сайжрууж, өрхийн эмнэлгүүдийг ахмад настанд чиглэсэн үйлчилгээтэй байлгах саналыг хэлжээ. Мөн ахмадуудын хөдөлмөр эрхлэлтийг дэмжиж, хүний нөөцийн дутагдалтай байгаа салбаруудад ажиллуулах хүсэлт тавьсан байна.

Тэгвэл иргэдийн зүгээс тэтгэвэр тогтооход шударга бус байдлыг халах асуудлыг дэвшүүлсэн бол хөгжлийн бэрхшээлтэй иргэдийн зүгээс төрийн байгууллагуудын орох, гарах гарцыг сайжруулах, төрийн байгууллагуудын хүнд суртлыг арилгаж, яам болон агентлагуудаас гарч буй шийдвэр, цаг үеийн мэдээллийн хүртээмжийг сайжруулах зэрэг санал хэлэв.

Гэр бүл, хөдөлмөр, нийгмийн хамгааллын сайд Л.Энх-Амгалан мэдээллийн ил тод байдал, хүртээмжийг сайжруулж, иргэдийн санал, гомдлыг шуурхай шийдвэрлэх үүргийг газар хэлтэс болон харьяа агентлагийн удирдлагууддаа өгчээ.