Хезболла бүлэглэл Израилийн агаарын довтолгооноос хамгаалах системийг дарахын тулд Оросын тактикийг ашиглаж магадгүй юм. Тодруулбал, Хезболла бүлэг Оросоос санаа авч Израилийн агаарын довтолгооноос хамгаалах байгууламж руу бөөнөөр нь пуужин харвах болно гэж цэргийн шинжээчид үзэж байна. Цаашилбал, Израилийн цэргийн гол баазууд, боомтууд, цахилгааны сүлжээг ч онилж магадгүй юм.

Израилийн арми Даваа гаригт Ливан дахь Хезболлагийн байгууламжуудад цохилт өгсний улмаас нас барагсдын тоо 558 хүрсэн. Ливан үүний хариуд хүчтэй цохилт өгч магадгүй гэж шинжээчид таамаглаж байна. Хэрвээ Ливан нэгэнт шийдсэн бол Оросын жишээ тэдэнд үнэ цэнтэй байх болно.

Хезболлагийн зэвсгийн нөөцөд 120-200 мянга орчим пуужин байж магадгүйг олон улсын судалгааны төв гуравдугаар сард тайлагнасан. Тус бүлэглэл зам, цэргийн байгууламж, нисэх онгоцны буудал зэрэг Израилийн гүн дэх объектуудад цохилт өгөх чадвартай.

ОХУ нь Украины хотууд болон дэд бүтцэд пуужин, нисгэгчгүй онгоцны масс цохилт өгч, зарим тохиолдолд агаарын довтолгооноос хамгаалах хүчийг нь сэтэлж чадсан. Тэгвэл Хезболла бүлэг Сирид Оросын армитай хамтран ажилласнаар тэднээс үлгэр жишээ авсан бололтой.

Вашингтон дахь Ойрхи Дорнодын бодлогын хүрээлэн наймдугаар сард тайлагнахдаа “Хезболла зэрэг бүлэглэлийг дэмжих нь Ойрхи Дорнод дахь АНУ-ын хүчийг сөрөх Кремлийн стратегийн нэг хэсэг” гэжээ.