Нийслэлийнхний толгойны өвчин болоод байгаа түгжрэлийн оргил ачааллын цагаар автобус ч эгнээгээр хөдөлгөөнд оролцох боломжгүй байдал үүссэн. Тиймээс 2018 онд нэгдүгээр эгнээгээр зөвхөн нийтийн тээвэр зорчих журмыг гаргаж байв. Гэвч жил бүр улиг болтлоо сануулсан ч журам дорвитой хэрэгжээгүй учир 2020 оноос 20 мянган төгрөгөөр торгох шийдвэр гарсан. Тус шинэ дүрмийн дагуу нийтийн тээврийн хэрэгслээс бусад тээврийн хэрэгсэл баруун гар тийш эргэхээс бусад тохиолдолд нэгдүгээр эгнээгээр зорчихыг хориглосон. Хэрэв зөрчвөл Зөрчлийн тухайн хуулийн 50 дугаар заалтад зааснаар 20 мянган төгрөгөөр торгох заалттай. Одоо ч энэ дүрэм үйлчилдэг. Гэхдээ хүмүүс камергүй замуудад нэгдүгээр эгнээгээр зорчсоор байгаа. Тиймээс шинэ шийдлийг олсон нь автозамуудын камераас гадна автобусны хяналтын хэрэгслээр нэгдүгээр эгнээгээр зорчигчдод хариуцлага тооцох.

Автобусны камер, гэрэл дохионы хяналтыг нэмснээр 20 мянгаар торгуулах тээврийн хэрэгсэл өмнөх саруудаас эрс нэмэгдсэн байна. Тухайлбал, есдүгээр сарын 2-20-ны өдрийн тоон мэдээллээр давтагдсан тоогоор 145 мянга 897 тээврийн хэрэгсэл нэгдүгээр эгнээгээр зорчиж. Энэ нь нийт 2.9 тэрбум төгрөг гэсэн үг.

ТЦА-наас тодруулахад, зөрчлийн мэдээллийг Замын хөдөлгөөний удирдлагын төв бүртгэдэг. Нэгдүгээр эгнээгээр өдөр бүр зорчиж торгуулах жолоочийн тоо өссөн. Торгуулийн бүртгэлийг камерын хяналтаар давхар бүртгэж байгаа. Авто замын нэгдүгээр эгнээнд нийт 44 камер бий. Мөн нийтийн тээврийн үйлчилгээнд явж буй 1100 автобусанд теле камер байршуулсан. Теле камерын тусламжтай 06:00-22:00 цагийн хооронд авто замын нэгдүгээр эгнээгээр зорчиж буй автомашин болон автобусны буудал дээр түр буюу удаан хугацаагаар зогсож хөдөлгөөнд саад болж буй жолооч нарын зөрчлийг баримтжуулж, Зөрчлийг Замын хөдөлгөөний удирдлагын төвөөс Тээврийн цагдаагийн албанд илгээж баталгаажуулснаас зөрчил гаргасан жолоочид хариуцлага тооцож байгаа.

Өдөр бүр нэгдүгээр эгнээгээр зорчиж зөрчил гаргаж байгаа этгээдийн торгууль нэмэгдэнэ. Одоогоор өөр хариуцлага тооцохгүй байгаа.

Дүрэм журмын дагуу зөрчлийг бүртгэж, торгож байгаа гэсэн юм.

Замын хөдөлгөөний удирдлагын төвөөс замын хөдөлгөөний зөрчлийг долоо хоног бүрээр гаргаж байгаа бөгөөд нэг долоо хоногт дунджаар 45-50 мянган зөрчил бүртгэгдэж байгаа аж. Тиймээс жолооч нар дүрмийн дагуу нэгдүгээр эгнээгээр зорчихгүй байхыг зөвлөж байна.