Орос, Украин улсууд энэ сарын 14-ний өдөр гурав дахь удаагаа дайны хоригдол солилцох арга хэмжээг зохион байгуулсан. Талууд тус бүр 103 хүнийг солилцжээ. Эхний хоёр арга хэмжээний үеэр нийт 267 хүн суллагдсан байдаг.

Мөн наймдугаар сарын 1-ний өдөр ОХУ болон барууны хооронд томоохон хэмжээний хоригдол солилцоо болж, 26 хүн тус тусын эх орондоо буцсан.

Гэвч энэ зуны хоригдол солилцоонд чечень дайчид огт багтаагүйг олон нийт анзаарчээ. "Memorial" хүний эрхийн байгууллагын тэргүүн Олег Орлов, түүхч Майрбек Вачагаев зэрэг олны танил хүмүүс энэ талаар дуугарч байна. Тухайлбал, Майрбек Вачагаев хэлэхдээ "Дэлхийн томчуудын агуу тоглоомын үеэр тэднийг хэн ч санасангүй" гэжээ.

Наймдугаар сарын 1-ний хоригдол солилцоонд нэг л хүн багтсан нь Вадим Красиков юм. Тэрбээр 2019 онд Германы иргэн Зелимхан Хангошвилийг хөнөөсөн хэргээр бүх насаараа хоригдох ялтай байсан. Тэрбээр Чеченийн хоёрдугаар дайнд оролцож байсан чечень командлагч юм. Красиков Москвад газардмагцаа ерөнхийлөгч Путинтэй мэндчилж "Ерөнхийлөгчийн амрыг эрье. Таны тушаал биелсэн" гэж хэлжээ. Мөн тэрбээр суллагдсан хойноо Германд хүний амь хэрхэн хөнөөснөө бахархалтайгаар дурсан ярьжээ. Түүнийг ФСБ-ын ажилтан гэдгийг Кремль олон жил үгүйсгэсэн юм.

Чечень гаралтай улс төрийн хоригдлууд олон бий. Алексей Навальныйг дэмжсэн жагсаалын үеэр Үндэсний гвардийн офицеруудтай тулалдаж, таван жилийн ял авсан Мухаммад Жумаев, хүүгийнхээ улс төр, хүний эрхийн үйл ажиллагааны улмаас Нижний Новгород дахь байрнаасаа хулгайлагдсан Зарема Мусаева зэрэг хүмүүс байна.