Одонтой ээж болон цалинтай ээжүүдийн мөнгийг цалингийн доод хэмжээнд хүргэхийг шаардаж ээж аавуудын төлөөлөл  өнөөдөр /2024.09.24/ мэдээлэл хийв.

-Ээжүүдийн төлөөлөл Г.Хажидмаа: Тэрбээр, төрөөс халамжлах шаардлагатай иргэд гэж байдаг. Ажил хөдөлмөр эрхлэх чадваргүй хөгжлийн бэрхшээлтэй иргэд нэг айлд хоёулаа байх нь ч бий. Ийм зүйл сүүлийн үед нэмэгдэх болсон. Нийгмээ дагаад ядуурал нэмэгдэж байна. Нийт хүн амын ядуурлын 75 хувь нь нэн ядуу. Энэ тоонд төрөөс халамж авах шаардлагатай иргэд ороод байна. Цалинтай ээжийн 50 мянган төгрөгийг нэмүүлье гэсэн маш олон ээжүүд хүсэлт явуулдаг. Зайлшгүй шаардлагатай одонтой ээжүүд болон цалинтай ээжүүдийн 50 мянга, хөгжлийн бэрхшээлтэй хүмүүсийн амьжиргааг нэн яаралтай дэмжмээр байна. УИХ-ын сонгуулийн өмнө засаг барьж байсан Засгийн газар, холбогдох яамнаас  одонтой ээж болон, цалинтай ээжийн тэтгэмжийг нэмнэ гэж салбарын сайд ярьж байсан. Гэхдээ УИХ-ын гишүүн болоод алга болчихлоо. Энэ асуудал буцаад хэвэндээ очсон. Сонгуулийн дараа холбогдох яамны сайд нь гарч ирээд цалинтай ээжийн 50 мянган төгрөгийг танана гэх болов. Иргэдийн саналыг татахын тулд хууран мэхэлж, сөрөг хүчнүүд ч чимээгүй болсон. Бид нар шаардаж, Засгийн газар шаардлагыг хэрэгжүүлдэг болоод найман жил болж байна. Энэ удаад Засгийн газрыг нэн яаралтай хөхүүл ээжүүдийн амьжиргааг дэмжээд өгөөч, одонтой ээжүүдийг анзаарч, хөгжлийн бэрхшээлтэй иргэдийг дэмжээд өгөөч гэсэн асуудлыг хөндөж байгаа юм.

Цалинтай ээж, одонтой ээжүүдийн авдаг тэтгэмжийг нэмж, хөгжлийн бэрхшээлтэй иргэдийг дэмжсэнээрээ нярай хүүхдүүдийн хоол тэжээлийн дутагдлыг багасгана гэж бодож байна.

Мөн бага насны хүүхдүүд маш их өвчилж байна. Энэ нь нярай хүүхдүүдийн хэрэглэдэг сүүн бүтээгдэхүүн, нэмэлт тэжээлүүд чанаргүй бүтээгдэхүүнүүд байгаатай холбоотой юм. Чанартайг нь авах гэхэд үнэ нь өндөр байдаг. Цалинтай ээжүүд нэг уут памперс авч хүрэхгүй байна шүү дээ гэх асуудлыг ярьдаг. Ийм учраас гэртээ хүүхдээ харж буй эхчүүдийн амьжиргааг нэмэх шаардлагатай байгаа юм. Энэ асуудлуудыг хэрэгжүүлэх хүртэл нь шаардсаар байх болно. Одонтой ээжүүд, цалинтай ээжүүдийн мөнгийг цалингийн доод хэмжээнд хүргэхийг шаардаж байна” гэлээ.

Аавуудын төлөөлөл Б.Батхуяг:

-Зарим хүмүүс энийг халамжийн бодлого гэж ойлгоод байна. “Цалинтай ээж”-ийн мөнгийг нэмэх шаардлагын гол үндэслэл нь эцэг эхчүүд дөнгөж төрсөн хүүхдэдээ сайн, чанартай зүйлийг хэрэглүүлж, ирээдүйд эрүүл саруул хүүхэд болохыг хүсэж байгаа. Гэтэл өнөөгийн нөхцөлд цалин өсөхөд, бараа бүтээгдэхүүний үнэ дагаад өсдөг. Томоор нь авч үзвэл гэртээ хүүхдээ хараад ажил хийж амжихгүй байгаа ээжүүдийн амьдралд энэ маш хүн цохилт болдог. Тиймээс нэмж хүүхэд төрүүлэхээс татгалзаж эхэлнэ. Өнөөдөр бид зөвхөн ээжүүдийн, хүүхдүүдийн мөнгөний тухай яриад байгаа юм шиг боловч Монгол Улсын хүн амыг хэрхэн хөгжүүлэх вэ гэдэг асуудлыг хөндөж байгаа юм.  Энэ бол хүн ам зүйн бодлого учраас Засгийн газар үүнийг нэн яаралтай авч хэрэгжүүлэх ёстой гэдгийг хэлмээр байна” гэсэн юм.

Т.Хүслэн