Улаанбаатар хотын авто замын засвар, шинэчлэлийн талаар нийслэлийн Замын хөгжлийн газрын дарга Б.Одбаяраас тодрууллаа.

Тэрбээр "Нийслэлийн Замын хөгжлийн газраас Замын сангийн хөрөнгөөр засвар шинэчлэлийн ажлуудыг гүйцэтгэдэг. Өнгөрсөн 2006 оноос хойш харахад, 10-17 байршилд 20 км зам засварын ажлыг хийдэг байсан бол энэ жил 162.3 км авто замд буюу 87 байршилд зам засч байна. Зам засварын ажил одоогоор 45 хувьтай үргэлжилж байна. Замын сангийн хөрөнгөөр зуны улиралдаа багтаан хийх ёстой ажлуудаа 95 хувьтай хийж дууссан.  Нийслэлийн эрх зүйн байдлын тухай хууль батлагдаж, бонд босгох боломжтой болсон. Бондын хөрөнгөөр өнгөрсөн зургадугаар сард тендерүүдээ зарлаж эхэлсэн. Цаг хугацаа их шаарддаг. Төлөвлөгөө ёсоор энэ оны аравдугаар сарын 30-нд зам засварын ажлаа дуусгах ёстой. Цаг агаар дулаан байвал өдрийн цагаар зам хааж, хучилтаа авахыг хичээж байна. Бид зам хаахдаа 72 цагийн өмнө мэдэгддэг. Замын компаниуд цаг хугацаатай уралдаж байна" гэв.