Норвегиос Испани руу нисч явсан онгоцны хоолноос амьд хулгана үсэрч гарч ирсэн тул онгоц Данид ослын буулт хийв. "Scandinavian Airlines"-ын нислэг Норвегийн Осло хотоос Испанийн Малагаг зорьж явжээ.

Жарл Боррестад гэх зорчигч болсон явдлын талаар ярьсан байна. Тэрбээр, хоолноос нь хулгана гарч ирсэн эмэгтэйн хажууд сууж явжээ. Тухайн эмэгтэй хоолоо нээтэл хулгана үсрэн гарч иржээ. Гэхдээ хүмүүс сандарч тэвдээгүй, тайван байсан аж.

Хулгана болон бусад мэрэгч амьтан аюулгүй байдалд эрсдэл учруулж болзошгүй гэж үзсэний үндсэн дээр онгоц Данийн Копенгагенд газардсаныг "Scandinavian Airlines"-ын хэвлэлийн төлөөлөгч Ойстен Шмидт хэлэв. Мөн ийм зүйл 1000-д нэг л тохиолдоно гэдгийг онцолжээ. Мэрэгч амьтад цахилгааны утсыг мэрж, зажлах эрсдэлтэй байдаг учир авиа компаниудын дүрэмд энэ нь харш байдаг аж. Дахин ийм зүйл давтагдахгүйн тулд хоол нийлүүлэгчдэд хяналт тавина гэж "Scandinavian Airlines" мэдэгдэв.

Данид ослын буулт хийсний дараа зорчигчдыг өөр онгоцонд шилжүүлж, Испани хүргэсэн байна.