Мэргэжлийн сүмогийн Аки башёгийн түрүү бөх Оносато өчигдөр/2024.09.23/ уламжлал ёсоор хэвлэлийн бага хуралд оролцлоо. Түүний хувьд дээд зиндаанд есөн башё барилдсаны дараа озэки цол хүртэж байгаа бөгөөд богино хугацаанд ийм өндөр цолонд хүрсэн цөөн бөхчүүдийн нэг болжээ.

Өдгөө 24 настай түүнийг озэки болсон гэдгийг ирэх Лхагва гаригт сүмогийн холбооны удирдлагуудын хурлаар албан ёсоор зарлана.

Нишоносэки дэвжээний бөх тэрбээр хэвлэлийн бага хурлын үеэр ярихдаа "Би дараагийн түрүүнийхээ төлөө илүү их хичээх болно. Түрүүлсэний дараа миний утас тасралтгүй дуугарсан. Үнэхээр олон хүн миний барилдааныг үздэг гэдгийг ойлгосон" гэжээ.

Оносато дээд зиндаанд хоёр удаа түрүүлсэн амжилттай. Тэрбээр Аки башёд 13 даваа, хоёр унаатай түрүүлсэн. Ингэхдээ 11 өдөр дараалан давж, түрүүлэх болзлоо нэг өдрийн өмнө хангасан юм. Түүний хувьд сүүлийн гурван башёд нийт 34 даваа авч, озэки цолны албан бус болзол болох 33 давааг давуулан биелүүлсэн юм.

Озэки цол хүртэж буй талаараа Оносато "Миний бодол санаа хөрсөн дээрээ бууж чадахгүй байна. Үнэхээр дасахгүй байна" гэв.

Сүмо сонирхогчид Оносатог дараагийн ёкозүна гэж ярьж, итгэл хүлээлгэж байгаа.

Оносато үргэлжлүүлэн "Хүмүүс надаас их зүйл хүлээж байгаа гэж бодож байна. Одоо бүх зүйлс улам хүндрэх болно. Би ч илүү ихийг хийхийн тулд улам хичээх болно. Озэки, ёкозүна болсон хүмүүс бүгд хүнд сорилтуудыг давж гарсан шүү дээ" гэлээ.