Үе үеийн хотын дарга нараас хамгийн сайн ажиллаж байгаа нь хэмээх тодотгол аваад буй Х.Нямбаатар сайныг ч, саарыг нь ч хослуулан дааж байгаа гэхэд хилсдэхгүй. Жишиг нийслэл биш ч гэлээ Улаанбаатарыг стандарттай хот болгохоор тэрбээр чамгүй хичээж буй.

ЗАМ ЗАСВАРЫГ ШУУРХАЙЛЖ, ИРЭХ ЖИЛҮҮДЭД ТӨСВИЙН МӨНГӨ ҮРГҮЙ ЗАРАХ ШААРДЛАГАГҮЙ БОЛОВ

Зам засварын ажлууд эхэндээ олны хэл амыг ихээр авч байв. Харин шинэчилсний дараагаар иргэд шинэчилсэн нь зөв байна гэдгийг хэлж байлаа. Арга ч үгүй биз. Сүүлийн 10 гаруй жил зам засвар дорвитой хийгдээгүй хотын иргэдэд энэ дүр зураг тун шинэ санагдах нь. Эхэндээ бухимдаж, богино хугацаанд шинэчилсэн хойно шагшиж байгаа нь нууц биш. Эвдрэл гэмтэлгүй замаар зорчих нь их хөдөлгөөнтэй нийслэлд таатай байх нь лавтай. Тиймдээ ч хүмүүс засварын ажил үргэлжилж, хөдөлгөөн хязгаарласан байршлуудад одоо нэг үеэ бодвол хүлээцтэй хандах болжээ.

Хотын дарга хэдхэн хоногийн өмнө зам засвартай холбоотойгоор цахим хуудастаа тайлбар хийж, энэ жил өнгөрсөн онуудаас 10 дахин урт зам засч, шинэчилж байгааг онцолсон.

Тодруулбал, Улаанбаатар хот жилд дунджаар 15-16 км зам засч, шинэчилдэг байсан бол энэ жил 162 км зам нэг дор засч, шинэчлэхээр төлөвлөсөн. Ийн 10 дахин урт зам засч, шинэчилж байгаа нь учиртай. Нийслэлээс бонд гаргаж, хотынхоо замыг бүхэлд нь шинэчилж, тээврийн хэрэгслийн зорчилтыг нэмэгдүүлэхээр төлөвлөсөн. Өөрөөр хэлбэл, ирэх 2025 оны эхний хагас жилд хотод нэг ч ширхэг хагархай зам байхгүй болох нь. Зарим хүн "Өдөр алдаж шөнө" гэдэг шиг хичээл сургуультай давхцаж, замаа засдаг нь ямар учиртай юм бэ гэж шүүмжилж буй. Гэхдээ 2024 оны зургадугаар сард хот бонд гаргах эрхээ авч, зураг төсвөө батлуулж, тендер зарласан. Үүнээс өмнө мөнгө байгаагүйг нийслэлийнхэн хэлсэн. Тиймээс замын ажил эхлүүлэх санаа байвч сачий хүрээгүй гэсэн үг. Харин эхний тендер долдугаар сарын 28-нд шалгарч, улмаар дараа дараагийн тендерүүд шалгарч ажил үргэлжлэх болсон.

Албаныхны зүгээс замын технологийн горим алдахгүй, хөрсөн дээр тэг хэм хүрч хүйтрэхээс өмнө замын ажлаа дуусгахаар төлөвлөж байгаа аж.

Одоогоор нийт төлөвлөсөн замынхаа 70 орчим хувийг гүйцэтгэжээ. Ирэх жилүүдэд хийх замын ажлын тендерийн сонгон шалгаруулалтыг өвөл хийх юм. Тухайлбал, Сэлбэ Сэлхийн зам, Гахайн байрны зам, Офицерын зам, Нарны зам, Энхтайвны өргөн чөлөө, Таван шарын уулзвараас Баянхошуу хүртэлх зам гэх мэт олон зам засварын ажлыг хийж, 2025 оны зургадугаар сарын 1-н гэхэд нийслэлийн одоогийн нэгдүгээр түвшний бүх замыг шинэчлэхээ Хотын дарга мэдэгдсэн. Ирэх онд нийслэлд хоёрдугаар түвшний буюу тойрог хурдны замын тендерийг мөн зарлана. Үүнээс гадна зам засвар хийж байгаа байршлуудад ирэх жилээс бордюр сольж, үргүй зардал гаргахгүй гэдгийг ч онцолсон. Энэ бол ажлаа аваад богино хугацааг өнгөрүүлж байгаа ч түүний нийслэлд хийсэн эхний том бүтээн байгуулалт.

ДАХИН ТӨЛӨВЛӨЛТИЙГ ЭРЧИМЖҮҮЛЖ, "20 МИНУТЫН ХОТ"-ЫГ ХЭРЭГЖҮҮЛНЭ 

Улаанбаатар хотын гэр хорооллыг дахин төлөвлөх төслийн хүрээнд Сэлбэ дэд төв орчимд иргэдийн хашааны газрыг чөлөөлж, орон сууцжуулахаар зөвшилцөл хийгдсэн. “Нийслэлийн орон сууцны корпораци” ХК-ийн мэдээлснээр Сэлбэ дэд төвийг түшиглэн орон сууцжуулах хүрээнд Сүхбаатар дүүргийн 14, Чингэлтэй дүүргийн 14, 18 дугаар хорооны гэр хорооллын 158 га газрын 2206 нэгж талбарыг чөлөөлж, дахин төлөвлөхөөр болсон билээ.

Оршин суугчдын хувьд газар чөлөөлөлтийн ажлыг дэмжин, хөрөнгийн үнэлгээнд хамтран ажиллаж буй. Нийслэлийн Газар зохион байгуулалтын албанаас өгсөн мэдээллээр, тус хэсгийн газрын 1 м.кв-ийн үнэлгээг гурван янзаар гаргасан байна. Төв зам дагуух газрыг 1 м.кв-ыг 380 мянга, дараагийн түвшний байршилд 240 мянга, өндөрлөг хэсэгт байгаа айлын газрыг 1 м.кв-ыг нь 175 мянга гэсэн үнэлгээг мэргэжлийн байгууллагын ажилтнууд тогтоожээ. Гуравдугаар сарын 6-ны өдрийн Засгийн газрын хуралдаанаар газар чөлөөлтийн тухай журам дэмжигдэн, гуравдугаар сарын 18-наас Сэлбэ дэд төвийн иргэдтэй ажиллах, ажлын хэсэг үйл ажиллагаагаа эхлүүлсэн. Тодруулж хэлбэл, дээрх бүсэд амьдардаг иргэн 700 м2 газартай гэж бодоход 1 м.кв-ыг 380 мянган төгрөгөөр үнэлүүлэхэд 260 сая төгрөг болж буй.

Энэ ажил урьд жилүүдийнх шиг үлгэр болоогүй, хөрсөн дээр буусан ажил болж, нүдэндээ ч итгэхгүй байгаагаа тус бүсийн айлууд хуваалцсан юм.

Ийнхүү гэр хорооллын дахин төлөвлөлтийг эрчимжүүлж байгаа нь Улаанбаатар утаанаас салах бодит шийдэл гарцаагүй мөн. Гэр хорооллын дахин төлөвлөлтийн төслүүд үр дүнд хүрээгүй шалтгааныг ч хотын дарга Х.Нямбаатар тайлбарласан. Өмнө нь аж ахуйн нэгжүүд газраа чөлөөлж, шугам сүлжээ татах, хөрөнгө оруулалт босгох зэрэг ажлаа бүгдийг нь хийж ирсэнтэй холбоотой. Энэ ажил хэт нүсэр тул хэсэг газарт чөлөөлөлт хийж, төлөвлөлтгүй шахуу хотхон, орон сууц ихээр барьсан. Үүний хажуугаар газар ч үгүй, орон сууц ч үгүй үлдсэн айл өрх олон. Харин нийслэлийн зүгээс гэр хорооллын дахин төлөвлөлтийн улмаас хохирсон Сонгинохайрхан, Баянгол, Баянзүрх дүүргүүдийн айл өрхүүдийн асуудлыг судалж, НОСК-иас орон сууц олгож, газрыг нь нийслэлд бүртгэх замаар иргэдийг хохиролгүй болгох шийд гаргасан гэсэн юм. Тиймээс Сэлбэ дэд төвтэй ижил газар чөлөөлөлтийн ажлууд ирэх, ирэх жилүүдэд ч эрчимжих нь. Энэ бол хотод тулгамдаад буй гол асуудлын нэг яах аргагүй мөн. Тэгэхээр Х.Нямбаатарт цаасан дээрх төлөвлөгөө уншихаас бодит ажил болгох зорилго байгаа нь дээрх дэд төвийн бүсийн айл өрхийн өнөөгийн жишээ харуулж байна

ИРГЭДТЭЙГЭЭ ТУЛЖ АЖИЛЛАЖ, АСУУДЛЫГ ШУУРХАЙ ШИЙДВЭРЛЭДЭГ УДИРДЛАГА

Иргэдтэйгээ, эрх барьж байгаа Засгийн газартайгаа ойр ажиллаж чадаж байгаа хотын удирдлагаар маргаангүй түүнийг нэрлэх хүн олон. Үер усны аюул, зам засварын маргаан, газар чөлөөлөлтийн асуудал гээд хийж байгаа ажилдаа эргэлзээ төрүүлэхгүй илэн далангүй нээлттэй байдаг нь түүнийг иргэдтэйгээ ойр ажилладгийн тод жишээ. Хүмүүст тулгамдаж байгаа асуудлыг сонсоод гар бариад өнгөрөх биш, дор бүр нь шийдвэр гаргадаг нь ч хотын даргын мөн нэг давуу чанар. Хамгийн сүүлд “Нарантуул” захын зүүн хойно байрлах иргэдийн ярьж заншсанаар “Мангасын ам” буюу захаас зүүн хойш гардаг гарцны хэсэгт ажиллаж, архидан согтуурдаг, тэнэмэл иргэд ихтэй, орчны нөхцөл байдлыг цэгцэлсэн. Тодруулбал, есдүгээр сарын 7-нд хотын дарга Х.Нямбаатар тухайн байршилд ажиллахдаа иргэдийн тав тух, аюулгүй байдлыг алдагдуулсан хэсэгт хэв журмыг сахиулах үүрэг өгсөн юм. Үүний дагуу тус байршилд цагдаагийн пост ажиллаж эхэлсэн. Энэ мэт олон эерэг жишээ, хамтарч ажиллахад давуу чанар их байгааг Ерөнхий сайд Л.Оюун-Эрдэнэ мөн онцолсон.

Тэрбээр, төрд Х.Нямбаатар шиг албан хаагч олон биш. Ихэнх нь "гал бариад яах вэ, чимээгүй байж байгаад цаг хугацаа өнгөрөөе" гэсэн хандлагатай байдаг. Тиймээс Ерөнхий сайдын хувьд би хотын том шинэчлэл хийхийг зориглоод шийдэж байгаа энэ үед нийслэлчүүд надтай гар нийлж, хамтран ажиллах Засаг даргыг сонгож өгөх нь туйлын чухал байна. Энэ Засгийн газарт гэхээсээ илүү нийслэлчүүдэд хэрэгтэй. Ерөнхий сайдын хувьд би бүх зүйлээр Х.Нямбаатар даргын ард зогсох болно гэсэн юм.