Цахим хуудаст нэгэн иргэн Бямба гаригийн шөнө /2024.09.21/ бүлэг залуус танхайрч, бусдын эд хөрөнгөд халдаж, зодож байгаа бичлэг нийтлэгдсэн. Энэ хэргийг шалгаж байгаа эсэхийг тодрууллаа.

Цагдаагийн ерөнхий газраас тодруулахад, Баянзүрх дүүргийн цагдаагийн хэлтэс тус хэргийг мөрдөн шалгаж эхэлсэн. Бичлэг дээрх хэрэг Бямба гаригийн 03:00 цагийн үед болсон. Мөрдөн шалгах ажиллагаа үргэлжилж байгаа гэв.

Бичлэгт нийтийн эзэмшлийн зам талбайд суудлын автомашин руу эрэгтэй хүмүүс халдаж байгаа бөгөөд тус тээврийн хэрэгслийн цонхыг хаглан, хаалгыг нь хүчээр онгойлгож байгаа нь үлдсэн байна. Мөн энэ үеэр эрэгтэй хүмүүсийн, чирээд буулгаач, наашаа буугаад ир гэж орилох нь сонсогдож, машинаас буусан хүнийг бүлэглэж зодож байгаа нь үлджээ. Бичлэг дээрх хүмүүсийг цагдаагийн байгууллага саатуулан шалгаж байгаа аж.