Нийслэлд авто зам засварын ажил үргэлжилж буй. Энэ онд нийт 87 байршилд 162 км авто зам шинэчлээхээр төлөвлөн ажиллаж байгаа. Үүнээс 35 байршилд зам засварын ажил гүйцэтгэж дуусжээ. Цаг агаар хүйтэрч шөнөдөө хасах хэмд хүрч байгаа учир асфальт бетон хучилт хийх боломжгүй байдаг аж. Тиймээс энэ долоо хоногт зам засварын ажлыг өдрөөр хийнэ гэдгийг Нийслэлийн замын хөгжлийн газраас мэдээлэв. Есдүгээр сарын 23-ны өдрийн 23:00 цагаас эхлэн “И-Март” дэлгүүрийн уулзвараас 120 мянгат буюу тэмээтэй хөшөө хүртэлх авто замын хойд хэсгийг дөрөв хоног хааж засварлахаар болжээ. Мөн тус замын засварын ажил дууссаны дараа уулын арын зам буюу Маршалын гүүрнээс, Налайхын уулзвар хүртэл замыг 10 хоног хэсэгчлэн хааж засварлах юм байна.

Зам засварын ажил аравдугаар сарын 30-н хүртэл үргэлжлэх аж.

Дараах замуудыг засварлана:

• Баянзүрх дүүрэг 13, 37, 42 дугаар хороо, Нарны зам, Өгөөмөр захаас Чулуун овооны тойрог хүртэлх авто замыг есдүгээр сарын 21-24-ний 6:00 цаг хүртэл хааж зам засварын ажил хийхээр болжээ.
• Хан-Уул дүүрэг, 17 дугаар хороо Их Монгол улсын гудамжны авто зам, Их тэнгэрийн уулзвараас “И-Март” худалдааны төвийн уулзвар хүртэлх авто замын хэсэгчилсэн засвар, шинэчлэлийн ажил есдүгээр сарын 22-ны өдрийн 23:00 цагаас  эхэлсэн.

Тэгвэл  есдүгээр сарын 26-ны өдрийн 06:00 цаг хүртэл хааж засварын ажил хийнэ. Мөн Хан-Уул дүүрэг 15, 18 дугаар хорооны нутаг дэвсгэр, Нийслэл хүрээ өргөн чөлөөний авто зам 120 мянгатын уулзвараас “И-МАРТ” худалдааны төв хүртэлх авто замын хэсэгчилсэн засвар, шинэчлэлийн ажил есдүгээр сарын 26-нд дуусна. Тодруулбал, хойд хэсгийн замыг  2024 оны есдүгээр сарын 23-ны өдрийн 23:00 цагаас эхлэн есдүгээр сарын 26-ны өдрийн 06:00 цагийн хооронд, урд хэсгийн замыг есдүгээр сарын 26-ны өдрийн 23:00 цагаас эхлэн хааж  есдүгээр сарын 28-ны өдрийн 06:00 цагийн хооронд  хааж засварлахаар болжээ.