"Huawei" болон "Apple"-ийн шинэ утаснууд Баасан гаригт Хятадад зэрэгцэн худалдаанд гарлаа. Гэвч "Huawei"-ийн олон үнэнч шүтэн бишрэгч 2800 ам.долларын үнэтэй гурав нугарч эвхэгддэг "Mate XT"-г олж авч чадаагүйдээ сэтгэл дундуур байна. Тодруулбал, зөвхөн урьдчилсан захиалга нь баталгаажсан хэрэглэгчид л тус утсыг авах боломжтой гэсэн тул Шэнжэнь хотод байрлах дэлгүүрийг зорин ирсэн хэрэглэгчид бухимдаж хоцорчээ. Тэд өөрсдийгөө "супер шүтэн бишрэгчид" гэж тодорхойлсон байна.

"Mate XT" нь "iPhone 16 Pro Max"-аас хоёр дахин өндөр үнэтэй байжээ.

Дэлгүүрийн гадаа өмнөх өдөр нь ирж дугаарласан нэгэн хэрэглэгч ярихдаа "Гурав нугарч эвхэгддэг энэ утас анхдагч учраас би өчигдөр орой 22:00 цагт энд ирсэн. Гэтэл маш их урам хугарлаа. Биднийг худалдаж авах боломжгүй гэдгийг эртнээс ойлгуулах ёстой байсан юм" гэжээ.

Бээжин дэх "Huawei"-ийн дэлгүүр ч адил байжээ. Харин Шанхайн салбарт борлуулалт хүлээлтээс давсан гэсэн ч дэлгэрэнгүй мэдээлэл өгөөгүй аж.

"Mate XT"-ийн урьдчилсан захиалга 6.5 сая давсан нь энэ оны хоёрдугаар улиралд дэлхий даяар нийлүүлэгдсэн 3.9 сая орчим эвхэгддэг утаснаас бараг хоёр дахин их гэсэн үг юм. Урьдчилсан захиалга өгөхийн тулд хэрэглэгч барьцаа байршуулах шаардлагагүй байжээ. "Huawei" чухам хэчнээн "Mate XT" үйлдвэрлэсэн, үүнээсээ хэдийг нь нээлтийн өдөр борлуулах талаар дэлгэрэнгүй мэдээлэл өгөөгүй байна.

Эх сурвалж: REUTERS