ОХУ-ын ерөнхийлөгч Владимир Путин өнгөрсөн Лхагва гаригт Санкт Петербург хотноо болсон Евразийн эмэгтэйчүүдийн чуулга уулзалтад оролцож, үг хэлсэн. Тэрбээр энэ үеэр эмэгтэйчүүдийг гэр бүл, ажил амжилтаа тэнцвэртэй авч явахад нь тусалж буй төрийн бодлогыг сайшаажээ. Мөн "Орос эмэгтэйчүүд энэ бүхнийг амархан зохицуулдаг атлаа хөөрхөн, сайхан, дур булаам хэвээрээ байгаа" гэж хошигносон байна.

ОХУ-ын төрөлтийн түвшин 1.4 байгаа нь хүн амыг тогтвортой байлгах зорилттой уялдсан 2.1 гэдэг тооноос хамаагүй бага үзүүлэлт юм. Кремлийн албаны хүмүүс Оросын статистикийг гамшиг гэж нэрлэжээ. Энэ нь мэдээж Украины дайнд залуу эрчүүд олноор амь үрэгдэж буйтай холбоотой.

"ОХУ-аас Украинд цэргийн тусгай явуулна гэж шийдсэн шигээ улс орны ирээдүйг баталгаажуулахын тулд хүн ам зүйн тусгай ажиллагаа явуулах шаардлагатай болсон" гэж нэгэн хууль тогтоогч хэвлэлд ярьжээ.

Тэгвэл ОХУ-ын эрх баригчид төрөлтийг нэмэгдүүлэхэд чиглэсэн ямар арга хэмжээнүүд авч байна вэ? Зарим бүс нутагт шинэхэн ээж болсон оюутнууд тэтгэмж авдаг бол Москвад жирэмсэн эхийн шинжилгээ, эмчилгээг үнэ төлбөргүй байлгахаар ажиллаж байна. Карелия, Челябинск мужуудад бүтэн цагаар суралцаж буй 25-аас доош насны эмэгтэйчүүд ээж болвол нэг удаагийн тэтгэмж авна.  Тэтгэмж, урамшууллаас гадна үр хөндөлтийг хязгаарлах бодлого хүртэл байдгийг "Медивестник" хэвлэлийн сэтгүүлч Лада Шамардина хэлжээ.

Мөн 18-40 насны эмэгтэйчүүдийг тусгай шинжилгээнд хамруулах хөтөлбөр хэрэгжиж байна. Шинжилгээний хариу сайнгүй гарсан эмэгтэйчүүдэд өндгөн эсээ хөлдөөх зэрэг дараагийн эмчилгээг санал болгох аж. Уг төлөвлөгөөнд эмэгтэйчүүд тийм ч таатай хандаагүй. Тухайлбал, телеграм хуудаснаа нэгэн эмэгтэй уг төлөвлөгөөг Маргарет Этвудын "Шивэгчний үлгэр" зохиолтой зүйрлэжээ.

Тоо баримт харвал, энэ оны эхний хагаст Орост 599600 хүүхэд төржээ. Энэ нь 2023 оны мөн үеэс 16 мянгаар бага үзүүлэлт. Цаашилбал, 1999 оноос хойших хамгийн муу үзүүлэлт болжээ.

ОХУ-ын Төрийн думын депутат Жанна Рябцева хэлэхдээ "18, 19 настай залуус хүүхэдтэй болох талаар бодох хэрэгтэй. Учир нь хамгийн сайн гэр бүл бол оюутан гэр бүл. Тэд хамтдаа амьдралыг туулдаг" гэжээ.

Харин "Медивестник" хэвлэлийн сэтгүүлч Лада Шамардина "Төрөлт бага байгаа гол шалтгаан нь орос эмэгтэйчүүд засгийн газартаа итгэхгүй байгаа явдал" гэжээ. Үндсэндээ тус улсад гэр бүл төлөвлөлт хэдийнэ эмзэг сэдэв болсон. Засгийн газар эмэгтэйчүүдийг ажил төрлөө орхин хүүхэд төрүүлэхийг уриалж, гэр бүлээ нэгдүгээрт тавиагүй хүмүүсийг илт буруушаах болжээ.

Эх сурвалж: CBC