УИХ-ын сонгуулийн өмнө уламжлалын дагуу бизнесийн салбарынхныг онилсон баривчилгаа, үйл ажиллагааг нь чиглэсэн акц явагдсан. Түүнд өртсөн хүмүүс нь "Алтайн хүдэр" компанийн эзэн Р.Базар, "Ачит Ихт" компанийн П.Цагаан, "Монполимет"-ын Ц.Гарамжав нар. Тухайн үед эрх баригч нам өрсөлдөгч намуудынхаа том хандивлагчдыг зорилготойгоор баривчиллаа гэх шүүмжлэл ч дагалдсан юм.

Өмнөх парламентын үед УИХ-аас Үндэсний баялгийн сангийн тухай хуулийг баталсан. Уг хуульд заасны дагуу стратегийн ордуудын 34 хувьд ногдох ногдол ашиг “Хуримтлалын сан"-д төвлөрч, эхний ээлжинд Үндэсний орон сууцжуулалтын хөтөлбөрт зарцуулахаар болсон юм. Үндэсний баялгийн сангийн тухай хууль батлагдсантай холбоотойгоор Засгийн газрын хуралдаанаас "Эрдэнэт үйлдвэр"-ийн овоолгыг ашиглаж байсан "Ачит Ихт" компанийн үйл ажиллагааг зогсоож, хуульд заасан 34 хувьд ногдох ашгийг төлүүлэхээр болсон юм.

Тэгвэл тус үйлдвэрийн үйл ажиллагааг эхлүүлэх чиглэлийг Аж үйлдвэр, эрдэс баялгийн сайд Ц.Туваан өгсөн гэх мэдээлэл олон нийтийн сүлжээнд цацагдах болсон. Гэхдээ үнэндээ Ц.Туваанд  ийм эр зориг хийгээд ухаан ч байхгүй. Засгийн газрын хуралдаанаас өгсөн чиглэлийн дагуу Ц.Туваан "Ачит Ихт" компанийн үйл ажиллагааг сэргээх шийдвэр гаргасан нь нэгэнтээ тодорхой.

Үнэндээ хамтарсан засагт орсон АН-ын сайд нар толгой мэдэн МАН-ын бодлогыг эсэргүүцэж чадахгүй. Ц.Тувааны хэвлэлд өгсөн  “Ачит Ихт” компанийн үйл ажиллагааг зогсоосноор тэнд ашиглагдаж байгаа далангуудын дүүргэлттэй холбоотой байгаль орчны ноцтой асуудал үүссэн. Тодруулбал, хүхрийн хүчлийн уусмал алдагдах нөхцөл бий болсон. Тиймээс Засгийн газраас яаралтай арга хэмжээ авах чиглэл өгсөн. Тухайн компанийн хууль шүүхтэй холбоотой болон 34 хувьтай холбоотой асуудлыг хөндөлгүй компанийг хэвийн ажиллах чиглэл өгсөн. Хуульд нөлөөлсөн асуудал байхгүй” гэдэг нь түүний гэхээсээ МАН-ын үг гэж ойлгоход  болно.

Товчдоо, сонгууль угтсан улстөржилт эдийн засагт сөргөөр нөлөөлж буйг МАН-ынхан ойлгосон байх талтай. Мөн үндэсний хөрөнгө оруулагчид гадагшаа зугтахаас болгоомжилсон ч байх. Эцэст нь хэлэхэд, УИХ-ын сонгууль дууссан. Орон нутгийн сонгуульд удахгүй болно. Тэгэхээр улстөржилтөө зогсоогоод эдийн засагтаа анхаарахаар шийдсэн байж болох юм.

Ямар ч байсан үндэсний үйлдвэрүүд улстөржилтөөс болж үүд хаалгаа барих нь Монголын эдийн засагт, улсын төсөвт таатай үйл явдал биш билээ.

Б.ШАРХҮҮ